အသင်းပိုင်ရှင်သစ် အပြောင်းအလဲ ဖြစ်ပြီးနောက် ကြယ်ပွင့် ကစားသမားတွေကို ခေါ်ယူဖို့ ကြိုးစားလာတဲ့ ပရီးမီးယားလိဂ် ကလပ် နယူးကာဆယ်အသင်းဟာ ချယ်လ်ဆီးအသင်းမှာ ပုံမှန် ပွဲထွက်ခွင့် ရဖို့ ရုန်းကန်နေရတဲ့ ဂျာမန် လက်ရွေးစင် တိုက်စစ်မှူး တီမိုဝါနာကို ခေါ်ယူဖို့ ချိတ်ဆက်မှုတွေ စတင် ပြုလုပ်နေပါတယ်။

အသက် ၂၅နှစ် အရွယ် ဂျာမဏီ လက်ရွေးစင် တိုက်စစ်မှူး တီမိုဝါနာဟာ ၂၀၂၀ နွေရာသီ အပြောင်းအရွှေ့ကမှ ဂျာမန် ဘွန်ဒက်လီဂါကလပ် လိုက်ပ်ဇက်အသင်း ကနေ ချယ်လ်ဆီးအသင်းထံ ပြောင်းရွှေ့ကြေး ယူရို ၅၃သန်းနဲ့ ပြောင်းရွှေ့လာသူ ဖြစ်ပြီး အသင်းနဲ့ ၂၀၂၅ခုနှစ် အထိ သက်တမ်း ရှိတဲ့ စာချုပ်တရပ် ချုပ်ဆိုထားသူလည်း ဖြစ်ပါတယ်။

Photo Credit: The Sun

တီမိုဝါနာဟာ ချယ်လ်ဆီးအသင်းထံ ရောက်ရှိပြီးနောက် ပွဲထွက်ခွင့်တွေ ဆက်တိုက် ဆိုသလို ရခဲ့ပေမယ့် သူ့ရဲ့ အဆုံးသတ်စွမ်းရည် အားနည်းချက်ကြောင့် ချယ်လ်ဆီးအသင်းရဲ့ နံပါတ်တစ် ဦးစားပေး တိုက်စစ်မှူး မဖြစ်သင့်ဘူး ဆိုတဲ့ ဝေဖန်မှုတွေ ခံခဲ့ရသလို လက်ရှိမှာလည်း လူကာကူရဲ့နောက် ဒုတိယ ဦးစားပေး တိုက်စစ်မှူး အဖြစ်သာ ရှိနေပါတယ်။

ဒါကြောင့်ပဲ နယူးကာဆယ်အသင်းဟာ သူတို့အသင်းရဲ့ တိုက်စစ်ပိုင်း အတွက် တီမိုဝါနာကို ခေါ်ယူဖို့ မျက်စိကျနေတာ ဖြစ်ပြီး တီမိုဝါနာကလည်း မှန်ကန်တဲ့ စီမံကိန်းတွေသာ ရှိမယ် ဆိုရင် နယူးကာဆယ်အသင်းဆီ ပြောင်းရွှေ့ဖို့ စိတ်ဝင်စားနေကြောင်း တီမိုဝါနာနဲ့ နီးစပ်သူတွေက ဆိုပါတယ်။

Photo Credit: The Sun

ဂျာမဏီသတင်းတွေနဲ့ ပတ်သတ်ပြီး စိတ်ချရတဲ့ သတင်းထောက် ခရစ်ဆန်ဖော့ခ်ကလည်း နယူးကာဆယ်က တီမိုဝါနာကို ခေါ်ယူဖို့ ချိတ်ဆက်မှုတွေ ပြုလုပ်နေကြောင်း အတည်ပြုပေးထားပြီး နယူးကာဆယ်က တီမိုဝါနာ အပြင် သူ့ရဲ့ အသင်းဖော် ရူဒီဂါကိုလည်း ခေါ်ယူဖို့ ကြိုးစားနေကြောင်း ရေးသား ဖော်ပြထားပါတယ်။

လူကာကူ ရောက်လာပြီးနောက် ပုံမှန်ပွဲထွက်ခွင့် ရဖို့ ရုန်းကန်နေရတဲ့ တီမိုဝါနာကို ငှက်ကျားတဦး အဖြစ် မြင်တွေ့ရတော့မှာလား…?