အဲဗာတန်အသင်းရဲ့ နည်းပြ ဒေးဗစ် မိုရက်စ်က မာဆေးဆိုက်ဒါဘီ မြို့ခံကလပ် လီဗာပူးလ်အသင်းရဲ့ တောင်ပံတိုက်စစ်ကစားသမား မိုဟာမက် ဆာလာဟာ စာချုပ်သက်တမ်း ကုန်ဆုံးတော့မယ့်အချိန် ဆာလာ ပရီးမီးယားလိဂ်ကနေ ထွက်သွားတာကို မြင်ရဖို့ မစောင့်နိုင်တော့ဘူးလို့ ပြက်ရယ်ပြု ပြောဆိုလိုက်ပါတယ်။
အီဂျစ်သား ဆာလာဟာ ဒီရာသီအကုန်မှာ လီဗာပူးလ်နဲ့ စာချုပ်သက်တမ်းကုန်ဆုံးမှာဖြစ်ပြီး အသင်းမှာ ဆက်နေနိုင်မလားလို့ မေးတဲ့အခါ သူက သိပ်မျှော်လင့်ချက်မရှိတဲ့ အဖြေမျိုးပေးခဲ့ပါတယ်။ ဒါပေမယ့် လီဗာပူးလ်ကတော့ ဒီရာသီ ပရီးမီးယားလိဂ်ရဲ့ ဂိုးသွင်းအများဆုံး ကစားသမားဖြစ်တဲ့ ဆာလာကို ဒီလိုမထွက်သွားအောင် စာချုပ်သစ်ချုပ်ဖို့ အသည်းအသန် ကြိုးစားနေပါတယ်။
Photo Credit : Goal
ဒါကြောင့် ဒီနေ့ ဗုဒ္ဓဟူးနေ့မှာ ကစားမယ့် အဲဗာတန်နဲ့ ပွဲက ဆာလာအတွက် နောက်ဆုံး မာဆေးဆိုက် ဒါဘီပွဲအဖြစ် နောက်ဆုံးတစ်ပွဲ ဖြစ်လာနိုင်ပါတယ်။ အဲဗာတန်နည်းပြ မိုရက်စ်က အသက်(၃၂)နှစ်အရွယ် ဆာလာကို ချီးကျူးစကားတွေ ပြောခဲ့ပေမယ့် သူ့ကို လေဆိပ်ထိ လိုက်ပို့ပြီး လေယာဉ်ပေါ်တင်ပေးချင်တယ်လို့ ဟာသလုပ်ခဲ့ပါတယ်။
“သူက လီဗာပူးလ်အတွက် ဒီရာသီမှာ မယုံနိုင်လောက်အောင် ကောင်းမွန်တဲ့ စွမ်းဆောင်မှုတွေ ပြသနေတယ်။ ဒါပေမယ့် တကယ်တမ်း ပြောရရင် သူက ဒီမျိုးဆက်ရဲ့ ပရီးမီးယားလိဂ်ထိပ်တန်း ကစားသမားတွေထဲက တစ်ယောက်ပါ။ ဒီရာသီတင်မကဘူး သူက ရာသီအများစုမှာ တည်ငြိမ်တဲ့ စွမ်းဆောင်မှုပြခဲ့တယ်။ ဂိုးတွေ အများကြီးသွင်းတယ်။ ဂိုးဖန်တီးမှုတွေ အများကြီးလုပ်ပေးတယ်။ ပွဲတိုင်းလိုလို ကစားနိုင်ပြီး ဒဏ်ရာလည်း သိပ်မရဘူး။ လီဗာပူးလ်အတွက် အရမ်းထူးချွန်တဲ့ ကစားသမားတစ်ယောက်ပါ။” လို့ မိုရက်စ်က ပြောပါတယ်။
Photo Credit : The Mirror
ဒါ့အပြင် ဆာလာ လီဗာပူးလ်နဲ့ လက်တွဲဖြုတ်တော့မယ့် အခြေအနေနဲ့ ပတ်သက်ပြီး မိုရက်စ်က “ကျွန်တော်တို့ သူ့ကို လေဆိပ်ထိ လိုက်ပို့ပြီး လေယာဉ်ပေါ်တင်ပေးရတာ ပျော်စရာကောင်းမှာပါ။ သူ့ကို ထွက်သွားအောင် လုပ်ပေးမယ်။” လို့ ဟာသနှောကာ ပြောလိုက်ပါတယ်။
လီဗာပူးလ်အသင်းဟာ ချန်ပီယံလိဂ်နဲ့ FA ဖလား ပြိုင်ပွဲတွေကနေ ထွက်ခဲ့ရပြီးပေမယ့် ဆာလာအနေနဲ့ မာဆေးဆိုက်မှာ သူ့ရဲ့ နောက်ဆုံးအချိန်တွေကို ပရီးမီးယားလိဂ် ချန်ပီယံဆုနဲ့ အဆုံးသတ်သွားမှာပါ။ လီဗာပူးလ်ဟာ ဗုဒ္ဓဟူးနေ့ ပွဲမတိုင်ခင်မှာ အမှတ်ပေးဇယားထိပ်ဆုံးမှာ (၉)မှတ်ဖြတ်ထားပြီး ချန်ပီယံဆုကို ရရှိဖို့ သေချာသလောက် ရဖို့ ရှိနေပါတယ်။
