ခေတ်ကုန်သွားပြီ အနားယူလိုက်သင့်ပြီလို့ ပြောဆိုခံနေရတဲ့ မော်ရင်ဟို

တူရကီကလပ် ဖီနာဘာချီအသင်းက နည်းပြ ဂျိုဆေး မော်ရင်ဟိုကို ရာထူးမှ ထုတ်ပယ်လိုက်ခြင်းဟာ အွန်လိုင်းပေါ်မှာ တုံ့ပြန်မှုတွေ အများအပြား ထွက်ပေါ်လာစေခဲ့ပြီး ပရိသတ်အချို့က သူ့ကို မန်ချက်စတာ ယူနိုက်တက်အသင်းထံ ပြန်လည်ရောက်ရှိလာနိုင်တယ်လို့ ထင်ကြေးပေးနေကြပါတယ်။

မော်ရင်ဟိုဟာ သောကြာနေ့ (ယနေ့) မှာ ဖီနာဘာချီအသင်းကို ချန်ပီယံလိဂ် အုပ်စုအဆင့်သို့ ပို့ဆောင်ပေးနိုင်ခြင်းမရှိဘဲ ဘင်ဖီကာအသင်းနဲ့ Play-off ပွဲစဉ်မှာ ရှုံးနိမ့်ခဲ့ပြီးနောက် ရာထူးမှ ထုတ်ပယ်ခံခဲ့ရတာ ဖြစ်ပါတယ်။ ဒီသတင်းထွက်ပေါ်လာပြီးနောက်မှာတော့ ပရိသတ်တွေက သူ့ရဲ့အနာဂတ်နဲ့ပတ်သက်ပြီး အမျိုးမျိုးသော တုံ့ပြန်မှုတွေ ပြုလုပ်ခဲ့ကြပြီး အချို့က သူ့ကို အနားယူဖို့ တိုက်တွန်းနေကြသလို အချို့ကတော့ မန်ယူနိုက်တက်ကို ပြန်လာသင့်တယ်လို့ ဆိုခဲ့ကြပါတယ်။

Photo Credit : Goal

ဆိုရှယ်မီဒီယာပေါ်က ပရိသတ်တွေရဲ့ တုံ့ပြန်မှုတွေကတော့ အောက်ပါအတိုင်း ဖြစ်ပါတယ်။ @CFC_Obed က “ဂျိုဆေးက လက်ရွေးစင်အသင်းတစ်သင်းလောက်ပဲ သွားကိုင်သင့်တယ်။ ကလပ်ဘောလုံးလောကကို စွန့်ခွာလိုက်ပါတော့။” လို့ ရေးသားခဲ့ပါတယ်။

@CryptoDevil9 ကတော့ “မန်ယူက ဒီအပတ် ဘန်လေနဲ့ပွဲမှာ ရှုံးရင် အမိုရင်ကို ထုတ်ပြီး မော်ရင်ဟိုကို ဒီရာသီအတွက် ပြန်ခန့်လိုက်ပါ။” လို့ ယူနိုက်တက်ကို ပြန်လာဖို့ တိုက်တွန်းခဲ့ပါတယ်။ @Mfc_mrpage က “ဂျိုဆေး မော်ရင်ဟိုက ပက် ဂွာဒီယိုလာထက် ပိုကောင်းတယ်လို့ ပြောခဲ့တဲ့သူတိုင်းကို ထောင် ၁၀ နှစ်လောက် ချထားသင့်တယ်။ တကယ့်ကို မလေးမစားလုပ်တာပဲ။” လို့ ပြင်းပြင်းထန်ထန် ဝေဖန်ခဲ့ပါတယ်။

Photo Credit : Goal

@Egi_Nupe က “လက်ခုပ်သံတွေ ကျယ်လောင်နေတုန်းမှာပဲ စင်မြင့်ပေါ်ကနေ ထွက်ခွာတတ်ဖို့ဆိုတာ ရှိတယ်။ ဒါကို မော်ရင်ဟိုရော ဂွာဒီယိုလာပါ နားလည်ဖို့လိုတယ်။” လို့ အနားယူသင့်ပြီဖြစ်ကြောင်း အရိပ်အမြွက် ပြောဆိုခဲ့ပါတယ်။ @90sbudha ကတော့ “မော်ရင်ဟိုက ခေတ်ကုန်သွားပြီ (washed)၊ သူ အနားယူသင့်ပြီ။” လို့ တိုက်ရိုက်ပြောဆိုခဲ့ပါတယ်။

မော်ရင်ဟိုဟာ နော်တင်ဟမ် ဖောရက်စ်အသင်းနဲ့လည်း သတင်းတွေထွက်ပေါ်ထားခဲ့ပြီး အခုလို အသင်းလက်မဲ့ဖြစ်သွားတာကြောင့် လာမယ့် သီတင်းပတ်တွေအတွင်းမှာ သူ့ရဲ့အနာဂတ်ဟာ အနီးကပ်စောင့်ကြည့်လေ့လာခံရတော့မှာ သေချာပါတယ်။ သူအနေနဲ့ အနားယူသွားမလား ဒါမှမဟုတ် စိန်ခေါ်မှုအသစ်တစ်ခုကို ချက်ချင်းလက်ခံမလားဆိုတာကိုတော့ မသိရသေးပါဘူး။