ချယ်လ်ဆီးအသင်းနည်းပြ အန်ဇို မာရက်စ်ကာက အသင်းရဲ့ ဘယ်နောက်ခံကစားသမား မာ့ခ် ကူကူရယ်လာရဲ့ စွမ်းဆောင်ရည်တွေအပေါ် ချီးကျူးပြောဆိုလာခဲ့ရင်း သူတို့အသင်းမှာ ကူကူရယ်လာလို ကစားသမားမျိုး (၇)ဦးခန့်လောက်အထိ လိုအပ်တယ်လို့ပါ ပြောဆိုသွားခဲ့ပါတယ်။
အသက် (၂၆)နှစ်အရွယ် လာမာစီယာ အကယ်ဒမီထွက် စပိန် လက်ရွေးစင် ဘယ်နောက်ခံလူ ကူကူရယ်လာဟာ လွန်ခဲ့တဲ့ (၂)နှစ်ကမှ ဘရိုက်တန်ကနေ ချယ်လ်ဆီးအသင်းဆီ ပေါင် (၆၂)သန်းနဲ့ ပြောင်းရွှေ့လာခဲ့တာဖြစ်ပြီး ချယ်လ်ဆီး ကစားသမားဘဝ အစပိုင်းတွေမှာတော့ ရုန်းကန်ခဲ့ရပြီး ခက်ခဲမှုတွေလည်း ရှိခဲ့ရပါတယ်။
Photo Credit : Chelsea News
ဒါပေမယ့် ကူကူရယ်လာဟာ စပိန်အသင်းနဲ့အတူ ယူရို-၂၀၂၄ ပြိုင်ပွဲမှာ ဘယ်သူမှ မထင်ထားလောက်အောင် ပြန်လည် တောက်ပခဲ့ပြီး စပိန် ယူရို ချန်ပီယံ ဖြစ်လာအောင်လည်း အဓိကကျတဲ့ နေရာကနေ စွမ်းဆောင်ပေးနိုင်ခဲ့ပါတယ်။ ဒါကြောင့်လည်း ကူကူရယ်လာက ဒီရာသီမှာ ချယ်လ်ဆီးအသင်းရဲ့ ပရီးမီးယားလိဂ် (၅)ပွဲလုံးကို ပွဲထွက်ကစားသမားအဖြစ် ဆက်တိုက် ပါဝင်ထားခဲ့ရပါတယ်။
ချယ်လ်ဆီးရဲ့ ဘယ်ခြမ်းခံစစ်မှာ နေရာတစ်နေရာ အခိုင်အမာ ရရှိထားတဲ့ ကူကူရယ်လာနဲ့ ပတ်သက်ပြီး အသင်းနည်းပြ မာရက်စ်ကာကတော့ ချီးကျူးမှုတွေ လုပ်ဆောင်လာခဲ့တဲ့အပြင် ကူကူရယ်လာကြောင့် သူ့အသင်းဖော်တွေပါ ပိုမို တိုးတက်လာခဲ့တယ်လို့လည်း ပြောဆိုခဲ့ပါတယ်။
Photo Credit : Chelsea Football Club
“မာ့ခ်(ကူကူရယ်လာ)က ကျွန်တော်တို့အသင်းအတွက် အရမ်းကို အရေးကြီးပါတယ်။ တခြား ကစားသမားတွေဆီမှာ ရှာဖွေလို့ ခက်ခဲနိုင်တဲ့ တချို့ အရာတွေက မာ့ခ်မှာ ရှိနေပါတယ်။ သူက ကောင်းမွန်ပြီးတော့ သူ့အနားမှာ ရှိနေတဲ့ ကစားသမားတွေကိုလည်း ကောင်းမွန်လာအောင် လုပ်နိုင်တယ်။”
“ဘာကြောင့်လဲဆိုတော့ သူက အသင်းဖော်တွေကို အမြဲတမ်း စကားတွေပြောနေတက်တယ်။ အမြဲတမ်း မှာကြားမှုတွေ လုပ်ဆောင်နေတက်တယ်။ အသင်းတစ်သင်းမှာ မာ့ခ်လို ကစားသမားမျိုး (၅)ယောက် (၆)ယောက် (၇)ယောက်လောက်သာ ရှိနေမယ်ဆိုရင်တော့ ကျန်တွေ ကစားသမားတွေရဲ့ တိုးတက်လာမှု အကြောင်းတွေကို ပြောနေရပါမယ်။ ဒါက အရေးကြီးပါတယ်။ ဒါကြောင့် ကျွန်တော်တို့ မာ့ခ်လို ကစားသမားမျိုး ရှိနေတာ ပျော်ရွှင်မိပါတယ်။” လို့ နည်းပြ မာရက်စ်ကာက ပြောဆိုသွားခဲ့ပါတယ်။
