မန်ချက်စတာ စီးတီးအသင်းနဲ့ ရီးယဲလ် မက်ဒရစ်အသင်းတို့ဟာ လာမယ့်နွေမှာ လေဗာကူဆင်အသင်းရဲ့ နည်းပြဖြစ်သူ ဇာဘီ အလွန်ဆိုအပြင် လေဗာကူဆင် ကြယ်ပွင့်ကစားသမားလေး ဖလော်ရီယန် ဝစ်ဇ်ကိုပါ တစ်ပါတည်း ခေါ်ယူသွားဖို့အတွက် အပြိုင်အဆိုင် စီစဉ်နေကြတယ်လို့ သတင်းထွက်ပေါ်လို့နေပါတယ်။
နည်းပြ အလွန်ဆိုဟာ ပြီးခဲ့တဲ့ ဘောလုံးရာသီတုန်းက လေဗာကူဆင်အသင်းကို ဘွန်ဒက်စ်လီဂါမှာ ရှုံးပွဲမရှိ ချန်ပီယံဖြစ်အောင် စွမ်းဆောင်ပေးနိုင်ခဲ့သလို ပိုကယ်ဖလားမှာလည်း ချန်ပီယံပါ ဖြစ်စေခဲ့သလို ယူရိုပါလိဂ်ပြိုင်ပွဲမှာဆိုရင်လည်း ဗိုလ်လုပွဲအဆင့်ထိ ရှုံးပွဲမရှိအောင် တက်လှမ်းခဲ့ပြီးမှ ဖိုင်နယ်မှာ ရှုံးပွဲကြုံခဲ့ရတာပဲ ဖြစ်ပါတယ်။
Photo Credit : Planeta Real Madird
အလွန်ဆိုလက်ထက်မှာ လေဗာကူဆင်ရဲ့ ဂျာမနီ ကွင်းလယ်တိုက်စစ် ကစားသမားလေး ဖလော်ရီယန် ဝစ်ဇ်ဟာလည်း တော်တော်လေး တောက်ပလာခဲ့ပြီး အလွန်ဆိုသာမက ဝစ်ဇ်ကိုပါ စိတ်ဝင်စားမှုတွေ မြင့်တက်လာခဲ့ပါတယ်။ ဒီထဲကမှ အလွန်ဆိုနဲ့ ဝစ်ဇ်တို့ ဆရာတပည့် နှစ်ဦးလုံးကို အလိုရှိတဲ့ အသင်းတွေလည်း ရှိလာကြပါတယ်။
နည်းပြအလွန်ဆိုကိုတော့ သူ ကစားသမားဘဝတုန်းက ပါဝင်ခဲ့တဲ့ လီဗာပူးလ် ဘိုင်ယန်မြူးနစ်နဲ့ ရီးယဲလ်တို့က အလိုရှိခဲ့ပေမယ့် လက်ရှိမှာ လီဗာပူးလ်နဲ့ ဘိုင်ယန်တို့က နည်းပြသစ် ခန့်လိုက်ပြီဖြစ်လို့ ရီးယဲလ်ကပဲ သူတို့နည်းပြကြီး အန်ဆယ်လော့တီ နေရာအတွက် အလွန်ဆိုကို အစားထိုး ခန့်အပ်ချင်လာခဲ့ပါတယ်။
Photo Credit : Sky Sports
ဒါပေမယ့် မန်စီးတီးအသင်းကလည်း ဒီရာသီအကုန်မှာ အသင်းနဲ့ စာချုပ်သက်တမ်း ကုန်ဆုံးတော့မယ့် နည်းပြ ဂွါဒီယိုလာနေရာအတွက် အလွန်ဆိုကို ခေါ်ယူသွားချင်နေပြီး အလွန်ဆိုက မန်စီးတီးထက် ရီးယဲလ်အသင်းဆီကိုသာ ကိုင်တွယ်သွားချင်နေပေမယ့် မန်စီးတီးကတော့ အလွန်ဆိုကို ရရှိနိုင်ဖို့အတွက် အသေအချာ ကြိုးပမ်းသွားဖွယ် ရှိနေပါတယ်။
မန်စီးတီးနဲ့ ရီးယဲလ်အသင်းတို့ဟာ နည်းပြအလွန်ဆိုကိုသာမကပဲ လေဗာကူဆင် ထိပ်တန်းကစားသမားလေး ဖလော်ရီယန် ဝစ်ဇ်ကိုပါ အလွန်ဆိုနဲ့အတူ ခေါ်ယူနိုင်သွားဖို့ စီစဉ်လို့နေပြီး တကယ်လို့ အလွန်ဆိုကို ခေါ်နိုင်မယ်ဆိုရင် ဝစ်ဇ်ကိုလည်း အသင်းဆီ အရ ခေါ်နိုင်ဖို့ အခွင့်အရေး ပိုကောင်းသွားနိုင်လိမ့်မယ်လို့ ယုံကြည်နေကြပါတယ်။
