မန်ချက်စတာ ယူနိုက်တက်အသင်းက အင်္ဂလန်တိုက်စစ်မှူးဟောင်း ပီတာ ခရော့ချ်နဲ့ ခပ်ဆင်ဆင်တူတဲ့ အီတလီတိုက်စစ်မှူး တစ်ဦးကို ခေါ်ယူဖို့ စဉ်းစားနေပါတယ်။ ဒီတိုက်စစ်မှူးဟာ အရပ် (၆)ပေ (၇)လက်မရှိပြီး လက်ရှိ စီးရီးအေကလပ် အူဒီးနီးစ်အသင်းမှာ ကစားနေတဲ့ လော်ရန်ဇို လူကာပဲ ဖြစ်ပါတယ်။ သူ့ကို ခေါ်ယူဖို့ ပြောင်းရွှေ့ကြေး ပေါင်(၂၅)သန်းလောက် ကုန်ကျနိုင်တယ်လို့ သိရပါတယ်။
လူကာဟာ အသက်(၂၄)နှစ်ပဲ ရှိသေးပေမယ့် သူ့ရဲ့ ကစားသမားဘဝမှာ တလှမ်းချင်း တိုးတက်လာခဲ့သူ ဖြစ်ပါတယ်။ ကစားသမားဘဝ အစောပိုင်းကာလကို တိုရီနိုအသင်းရဲ့ လူငယ်အကယ်ဒမီမှာ စတင်ခဲ့ပြီး အီတလီတတိယတန်းလိဂ် စီးရီးစီက ပါလာမိုအသင်းမှာ ၂၀၂၀-၂၁ ရာသီအတွင်း (၁၃)ဂိုးအထိ သွင်းယူခဲ့ပါတယ်။ အဲဒီအချိန်ကစလို့ သူ့ရဲ့ အရည်အချင်းတွေ ထွက်ပေါ်လာခဲ့ပြီး ဒုတိယတန်းလိဂ် စီးရီးဘီက ပီဆာအသင်းဆီ ပြောင်းရွှေ့ခဲ့ပါတယ်။ အဲဒီမှာ သူ့ရဲ့ အရပ်အမောင်းကြောင့် ပီဆာရဲ့မျှော်စင်ဆိုတဲ့ နာမည်ပြောင်ပါ ရခဲ့ပါတယ်။
Photo Credit : Goal
ဒါ့အပြင် လူကာဟာ နယ်သာလန်ထိပ်သီးအသင်း အေဂျက်စ်မှာ အငှားနဲ့ ကစားခဲ့ဖူးပြီး အခု အူဒီးနီးစ်အသင်းမှာ ပုံမှန်ဂိုးတွေ သွင်းနေတာကြောင့် နာမည်ပိုရလာခဲ့ပါတယ်။ ပြီးခဲ့တဲ့ (၂)ရာသီအတွင်း လူကာဟာ စီးရီးအေဂိုး (၁၈)ဂိုးအထိ သွင်းယူထားပြီး အီတလီ လက်ရွေးစင်အသင်းမှာလည်း ရွေးချယ်ခံခဲ့ရပြီး (၃)ပွဲ ကစားခွင့်ရခဲ့ပါတယ်။
ယူနိုက်တက်ကတော့ ဒီ ၂၀၂၄-၂၅ ရာသီမှာ တိုက်စစ်ပိုင်း အားနည်းနေပြီး ဂိုးသွင်းဖို့ ခက်ခဲနေတာကြောင့် ပရီးမီးယားလိဂ်မှာ အဆင့်(၁၃)နေရာပဲ ရထားပြီး အသင်းရဲ့ ဂုဏ်သတင်းနဲ့ မမျှတဲ့ အခြေအနေမှာ ရှိနေပါတယ်။ နည်းပြသစ် ရူဘင် အမော်ရင်အနေနဲ့ အသင်းကို ပြန်လည်တည်ဆောက်ဖို့ ကြိုးစားနေချိန်မှာ လူကာလို တိုက်စစ်မှူးမျိုးက အဖြေတစ်ခု ဖြစ်လာနိုင်မလားဆိုတာ စိတ်ဝင်စားစရာပါ။
Photo Credit : Opta Analyst
ဒါပေမယ့် ယူနိုက်တက်က လူကာတစ်ဦးတည်းကိုပဲ ပစ်မှတ်ထားနေတာ မဟုတ်ဘဲ လိုက်ပ်ဇစ်အသင်းက ဘင်ဂျမင် ဆက်စကို၊ နာပိုလီအသင်းကနေ ဂါလာတာဆာရေးမှာ အငှားကစားနေတဲ့ ဗစ်တာ အိုဆီမန်၊ အစ်ဝစ်ချ်တောင်းက မန်စီးတီး တိုက်စစ်မှူးဟောင်း လီယန် ဒီလပ်နဲ့ ဖရန့်ဖတ်အသင်းက ဟူဂို အီကီတိကီတို့ကိုလည်း စောင့်ကြည့်စာရင်းထဲမှာ ထည့်သွင်းထားလျက် ရှိနေပါတယ်။
လက်ရှိမှာတော့ ယူနိုက်တက်က လာမယ့် တနင်္ဂနွေနေ့မှာပဲ မြို့ခံကလပ် မန်စီးတီးအသင်းနဲ့ မန်ချက်စတာဒါဘီပွဲကို ဆင်နွဲသွားရဖို့ ရှိနေပြီး ကြားရက်မှာလည်း နော်တင်ဟမ် ဖောရက်စ်ကို ရှုံးနိမ့်ထားခဲ့တာကြောင့် ယူနိုက်တက်တို့ ဒီပွဲမှာ နိုင်ပွဲပြန်ရအောင် စွမ်းဆောင်ပြနိုင်မလားဆိုတာ စောင့်ကြည့်ချင်စရာကောင်းနေပါတယ်။
