မန်ချက်စတာ ယူနိုက်တက်အသင်းမှာ အပြောင်းအရွှေ့နောက်ဆုံးရက်မတိုင်မီ အရေးကြီးတဲ့ အလှုပ်အခတ်တွေ ဖြစ်ပေါ်နေပြီး လူငယ်ကြယ်ပွင့် ကိုဘီ မိန်းနူးက အသင်းကနေ အငှားထွက်ခွာခွင့် တောင်းဆိုလိုက်သလို တစ်ဖက်မှာလည်း အသင်းဖော် အလက်ဟန်ဒရို ဂါနာချိုကို ပြိုင်ဘက် ချယ်လ်ဆီးအသင်းထံ ပေါင် သန်း(၄၀) နဲ့ ရောင်းချဖို့ သဘောတူညီမှု ရရှိသွားပြီဖြစ်ပါတယ်။
အသက် (၂၀)အရွယ် မိန်းနူးဟာ နည်းပြရူဘင် အမိုရင်ရဲ့ လက်အောက်မှာ မျက်နှာသာပေးမှုမရတော့ဘဲ စိတ်မငြိမ်မသက်ဖြစ်နေခဲ့ပါတယ်။ The Athletic သတင်းဌာနရဲ့ ဖော်ပြချက်အရ ကွင်းလယ်ကစားသမားလေးဟာ ပုံမှန်ပွဲထွက်ခွင့်ရရှိဖို့အတွက် အသင်းကနေ အငှားထွက်ခွာလိုကြောင်း ကလပ်အသင်းကို တရားဝင်အကြောင်းကြားခဲ့ပါတယ်။
Photo Credit : Sky Sports
အင်္ဂလန်လက်ရွေးစင်ကစားသမားဟာ ကြာသပတေးနေ့က ကလပ်ရဲ့ ထိပ်တန်းတာဝန်ရှိသူတွေနဲ့ တွေ့ဆုံဆွေးနွေးခဲ့ပြီး အသင်းကနေ အပြီးသတ်ထွက်ခွာလိုခြင်း မဟုတ်ဘဲ သူ့ရဲ့ကစားသမားဘဝ တိုးတက်မှုအတွက် အငှားထွက်ကစားခြင်းက ပိုကောင်းမယ်လို့ ခံစားမိကြောင်း ပြောကြားခဲ့တယ်လို့ ဆိုပါတယ်။ ဒါပေမယ့်လည်း ယူနိုက်တက်အသင်းကတော့ မိန်းနူးရဲ့ အငှားထွက်ခွာခွင့်တောင်းဆိုမှုကို ခွင့်ပြုမှာမဟုတ်ကြောင်း ပြန်လည်အကြောင်းကြားခဲ့တယ်လို့ သိရပါတယ်။ ယူနိုက်တက်ဟာ သူ့ကို အသင်းလူစာရင်းရဲ့ အရေးပါတဲ့ အစိတ်အပိုင်းအဖြစ် တန်ဖိုးထားဆဲဖြစ်ပြီး အသင်းမှာဆက်နေကာ ပွဲထွက်နေရာအတွက် တိုက်ပွဲဝင်စေလိုနေပါတယ်။
မိန်းနူးဟာ လာမယ့်နွေရာသီ ကမ္ဘာ့ဖလားပြိုင်ပွဲအတွက် နည်းပြ သောမတ်စ် တူဟယ်လ်ရဲ့ အင်္ဂလန်လူစာရင်းမှာ ပါဝင်ခွင့်ရရေးအတွက် ပုံမှန်ပွဲကစားခွင့်ကို ရှာဖွေနေတာ ဖြစ်ပါတယ်။ သူဟာ ရာသီအဖွင့် ပရီးမီးယားလိဂ် နှစ်ပွဲဆက်တိုက်မှာ အရံခုံမှာသာ အသုံးမပြုဘဲ ထိုင်နေခဲ့ရပြီး ဗုဒ္ဓဟူးနေ့ညက ဂရင်းစဘီကို အရှက်ရဖွယ် ရှုံးနိမ့်ခဲ့တဲ့ ကာရာဘောင်းဖလားပွဲစဉ်မှာသာ ရာသီရဲ့ ပထမဆုံး ပွဲချိန်ပြည့် (၉၀)မိနစ် ကစားခွင့် ရခဲ့ပါတယ်။
Photo Credit : TEAMtalk
မိန်းနူးရဲ့ အနာဂတ်မရေရာချိန်မှာပဲ ယူနိုက်တက်ဟာ နောက်ထပ်အကယ်ဒမီထွက် ကစားသမားတစ်ဦးဖြစ်တဲ့ ဂါနာချိုကိုတော့ ချယ်လ်ဆီးအသင်းထံ ပေါင် သန်း(၄၀)နဲ့ ရောင်းချဖို့ သဘောတူညီမှု ရရှိသွားပြီဖြစ်ပါတယ်။ အသက် (၂၁)နှစ်အရွယ် အာဂျင်တီးနားကစားသမားဟာ ချယ်လ်ဆီးနဲ့ (၇)နှစ်သက်တမ်းရှိ စာချုပ်တစ်ရပ် ချုပ်ဆိုမှာဖြစ်ပြီး ဒီပြောင်းရွှေ့ကြေးဟာ ယူနိုက်တက်သမိုင်းတစ်လျှောက် အကယ်ဒမီထွက်ကစားသမားတစ်ဦးအတွက် ရရှိခဲ့ဖူးသမျှထဲမှာ အများဆုံးပြောင်းရွှေ့ကြေး ဖြစ်လာခဲ့ပါတယ်။ ဒါ့အပြင် ဒီရောင်းချမှုဟာ ခရစ္စတီယာနို ရော်နယ်ဒို၊ ရိုမီလူ လူကာကူနဲ့ အိန်ဂျယ် ဒီမာရီယာတို့ရဲ့ နောက်မှာ ကလပ်ရဲ့ စတုတ္ထမြောက် အကြီးဆုံးရောင်းချမှုလည်း ဖြစ်ပါတယ်။
SunSport ရဲ့ ဖော်ပြချက်အရ ချယ်လ်ဆီးဟာ အစောပိုင်းမှာ ပေါင် (၂၅)သန်းဝန်းကျင်နဲ့သာ ကမ်းလှမ်းခဲ့ပေမယ့် ယူနိုက်တက်က ပေါင် သန်း(၄၀)အထိရောက်အောင် ညှိနှိုင်းနိုင်ခဲ့တာ ဖြစ်ပါတယ်။ ဂါနာချိုကို ရောင်းချရာကနေ ရရှိတဲ့ငွေဟာ ဘဏ္ဍာရေးမျှတမှုစည်းမျဉ်း (FFP) အရ အမြတ်ငွေစစ်စစ်အဖြစ် သတ်မှတ်ခံရမှာဖြစ်တာကြောင့် ယူနိုက်တက်ဟာ မိန်းနူးကို အငှားမလွှတ်ဘဲ ထိန်းသိမ်းထားနိုင်တဲ့ အခြေအနေကို ရောက်ရှိသွားတာ ဖြစ်နိုင်ပါတယ်။
