လီဗာပူးလ်အသင်း နည်းပြသစ်ဖြစ်တဲ့ အာနယ် ဆလော့ကတော့ ရီးယဲလ်မက်ဒရစ်အသင်းရဲ့ လူငယ် ကြယ်ပွင့်ကစားသမားလေး အာဒါ ဂူလာကို အသင်းဆီ ခေါ်ဆောင်သွားချင်နေတယ်လို့ နာမည်ရ အားကစားသတင်းမီဒီယာTEAMtalk ကနေ သတင်းဖော်ပြလာခဲ့ပါတယ်။
နည်းပြကြီး ယာဂန် ကလော့ပ်နဲ့ လက်တွဲဖြုတ်ခဲ့ရတဲ့ လီဗာပူးလ်အသင်းဟာ ကလော့ပ်နေရာအတွက် ဖိုင်ယင်နော့ နည်းပြဖြစ်တဲ့ ဆလော့ကို အသင်းနည်းပြသစ်အဖြစ် ခန့်အပ်ခဲ့ပြီး အခုလည်း ဆလော့ အလိုရှိနေတဲ့ ကစားသမားတွေကို အသင်းဆီ ခေါ်ယူပေးသွားဖို့ပါ စီစဉ်လျက် ရှိနေပါတယ်။
Photo Credit : Transfermarket
လီဗာပူးလ်အသင်းကလည်း ဒီနွေမှာ အသင်းက ကစားသမား အများအပြားကို လက်လွတ်သွားရဖို့ ရှိနေပြီး အဲ့ဒီထဲမှာ ကွင်းလယ်လူ သီယာဂို အယ်လ်ကန်တာရာ ၊ တောင်ပံကစားသမား လူးဝစ် ဒီးယက်ဇ်နဲ့ မိုဟာမက် ဆာလာတို့ပါ ပါဝင်နေတာကြောင့် လီဗာပူးလ်အနေနဲ့ ဒီကစားသမားတွေအတွက် ကစားသမား အစားထိုးဖို့ လိုအပ်နေပါတယ်။
တောင်ပံနေရာတွေအတွက် အိုလီဆေး အပါအဝင် တောင်ပံကစားသမား အများအပြားကို ပစ်မှတ်ထားလျက် ရှိနေသလို ကွင်းလယ်တိုက်စစ်နဲ့ တောင်ပံတိုက်စစ်နေရာတွေမှာ လိုက်ပါကစားနိုင်တဲ့ တူရကီ ဆယ်ကျော်သသက် ကြယ်ပွင့်လေး အာဒါ ဂူလာကိုပါ စိတ်ဝင်စားနေခဲ့ပါတယ်။
Photo Credit : Managing Madrid
အသက် (၁၉)နှစ်အရွယ် တူရကီ လက်ရွေးစင် ကွင်းလယ်ကစားသမားလေး အာဒါ ဂူလာဟာ ပြီးခဲ့တဲ့ရာသီကမှ ဖီနာဘာချီကနေ ရီးယဲလ်အသင်းဆီ ပြောင်းရွှေ့ ရောက်ရှိလာခဲ့တာဖြစ်ပြီး တစ်ရာသီလုံးမှာတော့ ပြိုင်ပွဲစုံ (၁၂)ပွဲသာ ကစားခဲ့ရကာ (၆)ဂိုး သွင်းယူနိုင်ခဲ့ပါတယ်။ ဂူလာဟာ ရီးယဲလ်အသင်းရဲ့ အနာဂတ် ပရောဂျက်မှာ ပါဝင်နေတဲ့ ကစားသမားလေး ဖြစ်တာကြောင့် အသင်းကနေ အငှားရော အပြီးသတ်ပါ လက်လွတ်ဖို့ အစီအစဉ် မရှိနိုင်ပဲ အသင်းမှာသာ ထိန်းသိမ်းထားဖို့ ဆုံးဖြတ်ထားနိုင်ပါတယ်။
ဒါကြောင့် လီဗာပူးလ်အနေနဲ့ ဂူလာကို ခေါ်ယူဖို့ ခက်ခဲနိုင်ပေမယ့် လာမယ့်ရာသီမှာ ရီးယဲလ်အသင်းဆီ ဘာပေ အန်းဒရစ်ခ်တို့ ရောက်လာချိန် ဘယ်လင်ဟမ်ကလည်း တိုက်စစ်ကနေ ကွင်းလယ်တိုက်စစ်နေရာ ဆင်းကစားရနိုင်လို့ ဂူလာအတွက် ပွဲကစားခွင့်တွေက နည်းပါးကောင်း နည်းပါးလာရနိုင်ပြီး ဒီအခြေအနေကိုလည်း လီဗာပူးလ်အသင်းဘက်က သေချာပေါက် စောင့်ကြည့်နေနိုင်ပါတယ်။
