လီဗာပူးလ်အသင်းဟာ သူတို့ရဲ့ အဓိက နောက်ခံလူ အသင်းခေါင်းဆောင် ဗာဂျီးလ် ဗန်ဒိုက်ရဲ့ အနာဂတ်နဲ့ ပတ်သက်ပြီး မသေချာမှုတွေ ရှိနေချိန်မှာ အင်တာမီလန်ရဲ့ ကြယ်ပွင့် နောက်ခံကစားသမား အလက်ဇန်ဒရို ဘာစတိုနီကို ပစ်မှတ်ထားနေတယ်ဆိုတဲ့ သတင်းတွေ ထွက်ပေါ်လာပါတယ်။

နယ်သာလန် ခံစစ်မှူးကြီး ဗန်ဒိုက်ဟာ လီဗာပူးလ်အသင်း ခံစစ်တန်းရဲ့ အဓိက အင်အားတစ်ခုအဖြစ် နှစ်ပေါင်းများစွာ ရပ်တည်ခဲ့သလို ဆောက်သမ်တန်ကနေ ပြောင်းရွှေ့လာပြီးနောက် သူဟာ ၂၀၁၉မှာ ချန်ပီယံလိဂ် နဲ့ နောက်တစ်နှစ်အကြာမှာ ပရီးမီးယားလိဂ်ဖလားတွေ ရယူနိုင်မှုတွေမှာပါ အဓိက အခန်းကဏ္ဍကနေ ပါဝင်ခဲ့ပါတယ်။

ဒါ့အပြင် ဗန်ဒိုက်က ဒီရာသီမှာလည်း ပရီးမီးယားလိဂ်ဖလားကို နောက်တစ်ကြိမ် ထပ်ယူနိုင်ဖို့အတွက် အသေချာဆုံးဖြစ်အောင် စွမ်းဆောင်နေပေမယ့်လည်း အသက်(၃၃)နှစ် ရှိလာပြီဖြစ်တဲ့ ဗန်ဒိုက်ရဲ့ စာချုပ်ဟာ လာမယ့် နွေရာသီမှာပဲ သက်တမ်းကုန်ဆုံးမှာ ဖြစ်သလို သူ့ရဲ့ အနာဂတ်နဲ့ ပတ်သက်ပြီး မရေမရာ ဖြစ်နေရပါတယ်။

Photo Credit : Football FanCast

ဒီအခြေအနေကြောင့် လီဗာပူးလ်ဟာ ဗန်ဒိုက်ရဲ့ နေရာမှာ အစားထိုးဖို့ အလားအလာရှိတဲ့ ကစားသမားတွေကို ရှာဖွေနေပြီး ဘာစတိုနီက ထိပ်ဆုံးက ပစ်မှတ်ဖြစ်လာခဲ့ပါတယ်။ အသက်(၂၅)နှစ်သာရှိသေးတဲ့ ဘာစတိုနီဟာ အင်တာမီလန်မှာ ကမ္ဘာ့အဆင့်မီ ဗဟိုနောက်ခံလူတစ်ဦးအဖြစ် သူ့ကိုယ်သူ သက်သေပြထားခဲ့ပါတယ်။ သူဟာ ဘောလုံးကို ထိန်းချုပ်ပြီး ဖြန့်ဝေနိုင်တဲ့ အရည်အချင်းနဲ့ နည်းဗျူဟာပိုင်းဆိုင်ရာ ထိန်းချုပ်မှုမှာ ထူးချွန်သူဖြစ်ပြီး အင်တာရဲ့ ၂၀၂၃-၂၄ စီးရီးအေ ဖလားနဲ့ ၂၀၂၃ ချန်ပီယံလိဂ် ဖိုင်နယ်ထိ ရောက်ရှိရာမှာ အဓိက နေရာကနေ ပံ့ပိုးပေးခဲ့သူလည်း ဖြစ်ပါတယ်။

သူ့ရဲ့ ဘယ်ဘက်ကနေ တိုက်စစ်ကို တည်ဆောက်ပေးနိုင်မှု တိကျတဲ့ အကွာအဝေး ပေးပို့မှုနဲ့ ဖိအားအောက်မှာ တည်ငြိမ်မှုတွေက လီဗာပူးလ်ရဲ့ ကစားပုံနဲ့ အံဝင်ခွင်ကျ ဖြစ်နိုင်တယ်လို့ ဘောလုံးသုံးသပ်သူတွေက ယူဆထားကြပါတယ်။ လီဗာပူးလ်နည်းပြ အာနေး စလော့ဟာ ၄-၃-၃ ကစားပုံကို အသုံးပြုနေပြီး နောက်ခံလူတွေဆီက ဘောလုံးကို တိုက်စစ်ဆီ ချိတ်ဆက်ပေးနိုင်မှုကို အားပြုတတ်သူ ဖြစ်ပါတယ်။

Photo Credit : Anfield Watch

လီဗာပူးလ်ဟာ ဗန်ဒိုက်ကို အလွတ်နဲ့ လက်လွတ်လိုက်ရနိုင်မယ့် အခြေအနေမှာ ဘာစတိုနီလို အသက်ငယ်ရွယ်ပြီး အရည်အသွေးမြင့်တဲ့ နောက်ခံလူတစ်ဦးကို ခေါ်ယူဖို့ စဉ်းစားတာဟာ အသင်းရဲ့ အနာဂတ်ကို တည်ဆောက်ဖို့ ဗျူဟာတစ်ခုဖြစ်နိုင်ပါတယ်။ ဘာစတိုနီဟာ အင်တာမှာ စီးရီးအေဖလားကို ရယူနိုင်ခဲ့ပြီး ဥရောပအဆင့် ပြိုင်ပွဲတွေမှာပါ အတွေ့အကြုံရှိသူဖြစ်တာကြောင့် လီဗာပူးလ်ရဲ့ ချန်ပီယံလိဂ်နဲ့ ပရီးမီးယားလိဂ် အောင်မြင်မှုတွေကို ဆက်ထိန်းဖို့ အထောက်အကူဖြစ်နိုင်ပါတယ်။

ဒါပေမယ့် ဘာစတိုနီကို ခေါ်ယူဖို့က လွယ်ကူတဲ့ ကိစ္စတော့ မဟုတ်ပါဘူး။ သူ့ရဲ့ စာချုပ်ဟာ ၂၀၂၈ အထိ သက်တမ်းရှိနေပြီး အင်တာကလည်း သူ့ကို အဓိက ကစားသမားအဖြစ် အားကိုးထားတာကြောင့် မြင့်မားတဲ့ ပြောင်းရွှေ့ကြေးတစ်ရပ်အထိ တောင်းဆိုလာနိုင်ပါတယ်။ Transfermarket မှာတော့ ဘာစတိုနီရဲ့ လက်ရှိ တန်ကြေးကို ယူရို(၇၅)သန်းအထိ သတ်မှတ်ထားပါတယ်။ ဒါကြောင့် လီဗာပူးလ်အတွက် ကြီးမားတဲ့ ရင်းနှီးမြှုပ်နှံမှုတစ်ခု ဖြစ်လာနိုင်ပေမယ့် ဘာစတိုနီရဲ့ အလားအလာနဲ့ လက်ရှိစွမ်းရည်ကို ကြည့်ရင် တန်ဖိုးရှိတဲ့ ရင်းနှီးမှုတစ်ခုလို့ ယူဆနိုင်ပါတယ်။