လာမယ့်နွေမှာ ကွင်းလယ်ပိုင်းအတွက် ကစားသမား အင်အား ဖြည့်တင်းမှု လုပ်ဆောင်သွားရဖို့ ရှိနေတဲ့ လီဗာပူးလ်အသင်းဟာ နွေဈေးကွက်ထဲ အလွတ် ပြောင်းရွှေ့ကြေးနဲ့ ခေါ်ယူသွားနိုင်မယ့် လက်စတာ ကွင်းလယ်လူ ယူရီတီလေမန်းစ်ကိုပါ ပစ်မှတ်ထားလျက် ရှိနေပါတယ်။
Photo Credit : Football London
လီဗာပူးလ်အသင်းက အသင်း ကွင်းလယ်ပိုင်းအတွက် ဒေါ့မွန်ရဲ့ အင်္ဂလန် ကြယ်ပွင့် ဂျုစ့်ဘယ်လင်ဟမ်ကို အဓိက ပစ်မှတ်ထားခဲ့တာ ဖြစ်ပေမယ့်လည်း ဘယ်လင်ဟမ်က ရီးယဲလ်မက်ဒရစ်ဆီသာ ပြောင်းရွှေ့ဖို့ များနေတာကြောင့် ဘရိုက်တန် ကွင်းလယ်လူ မက်အယ်လစ္စတာ နဲ့ ချယ်လ်ဆီး ကွင်းလယ်လူ မေဆန်မောင့်တို့ကိုသာ ပြောင်းလဲ ကြိုးပမ်းလာခဲ့တာ ဖြစ်ပါတယ်။ တကယ်လို့ ဒီကစားသမား (၂)ဦးထဲက တစ်ယောက်ယောက်ကို ခေါ်နိုင်ခဲ့မယ်ဆိုရင်တောင် လီဗာပူးလ် ကွင်းလယ်က ထပ်မံ အားဖြည့်ဖို့ လိုနေနိုင်သေးတာမို့ ပြောင်းရွှေ့ကြေး ပေးစရာ မလိုအပ်တဲ့ တီလေမန်းစ်ကိုပါ မျက်စိကျလာခဲ့တာ ဖြစ်ပါတယ်။
Photo Credit : Sport Mole
လက်စတာအသင်းရဲ့ ဘယ်လ်ဂျီယံ လက်ရွေးစင် ကွင်းလယ်လူ တီလေမန်းစ်ဟာ ၂၀၁၉ခုနှစ်ကတည်းက မိုနာကိုကနေ လက်စတာကို ရောက်ရှိလာခဲ့တာဖြစ်ပြီး အခုဆိုရင် လက်စတာအတွက် ပရီးမီးယားလိဂ် ပွဲပေါင်း (၁၅၀)နီးပါးအထိတောင် ကစားထားနိုင်ခဲ့ပါတယ်။ Holding midfielder တစ်ဦးဖြစ်တဲ့ တီလေမန်းစ်ဟာ ကွင်းလယ် တိုက်စစ်နေရာမှာ ကစားပုံ ပိုကောင်းတတ်သူဖြစ်ပြီး အဝေးကန်ချက်တွေနဲ့လည်း ဂိုးတွေ ရယူနိုင်သူ ဖြစ်ပါတယ်။ လက်ရှိမှာတော့ တီလေမန်းစ်က လက်စတာနဲ့ စာချုပ် သက်တမ်း ကုန်ဆုံးတော့မှာ ဖြစ်တဲ့အပြင် လက်စတာကိုယ်တိုင်ကလည်း ပရီးမီးယားလိဂ်ကနေ တန်းဆင်းရနိုင်တဲ့ အခြေအနေမျိုး ဖြစ်နေတာကြောင့် ဒီအခြေအနေကို ကလပ်အသင်း များစွာက စောင့်ကြည့်နေကြပြီး ဒီထဲမှာ လီဗာပူးလ်လည်း ပါဝင်လာပါတယ်။
အသက်(၂၆)နှစ်အရွယ် ဘယ်လ်ဂျီယံ ကွင်းလယ်လူကို လီဗာပူးလ်အပြင် အာဆင်နယ် မန်ယူနိုက်တက်တို့နဲ့ ဘာစီလိုနာလို အသင်းတွေကပါ အပြိုင်အဆိုင် စိတ်ဝင်စားနေတာဖြစ်လို့ လက်စတာကို စွန့်ခွာဖို့ သေချာနေတဲ့ တီလေမန်းစ်အနေနဲ့ ဘယ်ကလပ်အသင်းကို ရွေးချယ် ပြောင်းရွှေ့သွားမလားဆိုတာကိုသာ စောင့်ကြည့်ရတော့မှာ ဖြစ်ပါတယ်။
