ပရီးမီးယားလိဂ် နာမည်ကြီးကလပ် စပါးအသင်းနဲ့ အင်္ဂလန် လက်ရွေးစင်အသင်းတို့ရဲ့ အဓိက တိုက်စစ်မှူး ဟယ်ရီကိန်းဟာ ယမန်နေ့ညမှာ ကစားခဲ့တဲ့ အင်္ဂလန်အသင်းနဲ့ အန်ဒိုရာအသင်းတို့ရဲ့ ကမ္ဘာ့ဖလား ခြေစစ်ပွဲမှာ အသင်းအတွက် သွင်းဂိုး ၁ဂိုး သွင်းယူနိုင်ခဲ့ပြီးနောက် အင်္ဂလန် လက်ရွေးစင်အသင်းရဲ့ ထာဝရ ဂိုးသွင်း အများဆုံး ကစားသမား ၅ဦး စာရင်းထဲ ဝင်ရောက်နိုင်ခဲ့ပါတယ်။

ဝင်ဘလေကွင်းမှာ ကစားခဲ့တဲ့ အဆိုပါပွဲစဉ်မှာ အင်္ဂလန်အသင်းဟာ အန်ဒိုရာအသင်းကို ပွဲစပွဲဆုံး ဖိအားပေး ကစားကာ ကွင်းလယ်တိုက်စစ် ကစားသမား လင်ဂတ်ရဲ့ သွင်းဂိုး ၂ဂိုး ၊ လူငယ် တောင်ပံ ကစားသမား ဆာကာရဲ့ သွင်းဂိုး ၁ဂိုးနဲ့ ဟယ်ရီကိန်းတို့ရဲ့ သွင်းဂိုး ၁ဂိုးတို့ကြောင့် ၄-၀ ဆိုတဲ့ ရလဒ်နဲ့ သက်တောင့်သက်သာ အနိုင်ရခဲ့တာပဲ ဖြစ်ပါတယ်။

Photo Credit: MSN

အင်္ဂလန်အသင်းရဲ့ အသင်းခေါင်းဆောင် ဟယ်ရီကိန်းဟာ အဆိုပါပွဲစဉ်မှာ ပွဲထွက် ကစားသမား အဖြစ် ပါဝင် ကစားခွင့် မရခဲ့ပေမယ့် ပွဲကစားချိန် ၆၂မိနစ်မှာတော့ ဘန်းဖို့ဒ်နဲ့ လူစားလဲကာ ဝင်ရောက် ကစားခွင့် ရခဲ့ပြီး ပွဲကစားချိန် ၇၂မိနစ်မှာတော့ ပင်နယ်တီကနေ တဆင့် အသင်းအတွက် ဒုတိယမြောက် ဦးဆောင်ဂိုးကို သွင်းယူ ပေးနိုင်ခဲ့ပါတယ်။

အဆိုပါသွင်းဂိုးကြောင့် ဟယ်ရီကိန်းရဲ့ အင်္ဂလန် လက်ရွေးစင်အသင်း အတွက် သွင်းယူပေးခဲ့တဲ့ သွင်းဂိုး အရေအတွက်ဟာ စုစုပေါင်း ၄၀ဂိုး အထိ ရှိလာခဲ့ပြီး အင်္ဂလန်အသင်းရဲ့ ထာဝရ ဂိုးသွင်းအများဆုံး ကစားသမား စာရင်းရဲ့ ပဥ္စမနေရာမှာ ဂန္တဝင် တိုက်စစ်မှူးဟောင်း မိုက်ကယ်အိုဝင်နဲ့အတူ ပူးတွဲ ရပ်တည်နိုင်ခဲ့ပါတယ်။

Photo Credit: MSN

လက်ရှိ အင်္ဂလန်အသင်းရဲ့ ထာဝရ ဂိုးသွင်းအများဆုံး ကစားသမား အဖြစ် မန်ချက်စတာ ယူနိုက်တက် အသင်းရဲ့ တိုက်စစ်မှူးဟောင်း ဝိန်းရွန်းနီက သွင်းဂိုး ၅၃ဂိုးနဲ့အတူ ရပ်တည်နေတာ ဖြစ်ပြီး ဟယ်ရီကိန်းဟာ လက်ရှိမှာ အသက် ၂၈နှစ် အရွယ်သာ ရှိသေးသလို သူ့ရဲ့ ဂိုးသွင်းစွမ်းရည်ကြောင့် မကြာခင်မှာပဲ ဝိန်းရွန်းနီရဲ့ စံချိန်ကို ကျော်ဖြတ်ကာ အင်္ဂလန်အသင်းရဲ့ ထာဝရ ဂိုးသွင်းအများဆုံး ကစားသမား အဖြစ် မှတ်တမ်းဝင်နိုင်ဖွယ် ရှိပါတယ်။