ဘိုင်ယန်မြူးနစ်အသင်းရဲ့ ကစားသမားသစ်တွေဖြစ်ကြတဲ့ ဟယ်ရီ ကိန်းနဲ့ လူးဝစ် ဒီယက်ဇ်တို့ဟာ ဂျာမန်စူပါဖလားပြိုင်ပွဲမှာ တစ်ယောက်တစ်ဂိုးစီ သွင်းယူပြီး သူတို့ရဲ့ ပထမဆုံး ဆုဖလားကို အတူတကွ ဆွတ်ခူးနိုင်ခဲ့ပါတယ်။ ပွဲအပြီးမှာတော့ အနိုင်ဂိုးသွင်းယူခဲ့သူ လူးဝစ် ဒီယက်ဇ်က သူ့ရဲ့ တိုက်စစ်အတွဲဖက် ဟယ်ရီ ကိန်းကို အထူးချီးကျူးပြောကြားခဲ့ပါတယ်။
စတုဂတ်အသင်းကို ၂-၁ နဲ့ အနိုင်ရခဲ့တဲ့ ဒီပွဲမှာ အင်္ဂလန်အသင်းခေါင်းဆောင် ဟယ်ရီ ကိန်းက ဦးဆောင်ဂိုးကို သွင်းယူပေးခဲ့ပြီး ကိုလံဘီယာ တောင်ပံကစားသမား ဒီယက်ဇ်က အသင်းအတွက် အနိုင်ဂိုးကို သွင်းယူပေးခဲ့တာပါ။ တစ်ချိန်က ပရီးမီးယားလိဂ်ရဲ့ ပြိုင်ဘက်တွေဖြစ်ခဲ့တဲ့ သူတို့နှစ်ဦးဟာ အခုတော့ နည်းပြ ဗင်းဆင့် ကွန်ပနီရဲ့ ဘိုင်ယန်အသင်းမှာ တိုက်စစ်အတွဲဖက်တွေ ဖြစ်လာခဲ့ပါတယ်။
Photo Credit : FC Bayern Munich
ဒီနွေရာသီမှာ လီဗာပူးလ်ကနေ ဒီယက်ဇ်ကို ယူရို (၇၅)သန်းနဲ့ ခေါ်ယူခဲ့တဲ့ ဘိုင်ယန်ဟာ ဒီရာသီမှာ ပြိုင်ပွဲစုံမှာ ချန်ပီယံဆုတွေကို စိန်ခေါ်ဖို့ ရည်မှန်းနေပါတယ်။ ကစားသမားနှစ်ဦးစလုံးဟာ သူတို့ရဲ့ကစားသမားဘဝတစ်လျှောက် မရရှိဖူးသေးတဲ့ ချန်ပီယံလိဂ်ဖလားကို ဆွတ်ခူးနိုင်ဖို့လည်း မျှော်လင့်နေကြပါတယ်။
ပွဲအပြီးမှာ ဒီယက်ဇ်က “ဒီည ကျွန်တော် အရမ်းပျော်ပါတယ်။ ဂိုးသွင်းနိုင်ခဲ့တာက တကယ်ကို ထူးခြားပါတယ်။ ဘိုင်ယန်အတွက် ပထမဆုံး တရားဝင်ဆုဖလားနဲ့ ပထမဆုံးဂိုး၊ ဘာပြောရမလဲတောင် မသိတော့ပါဘူး။ ကျွန်တော့်အတွက် အံ့မခန်းညတစ်ညပါပဲ။ ဟယ်ရီ ကိန်းလို ကစားသမားနဲ့ တွဲကစားရတာ ထူးခြားတဲ့ ခံစားချက်ပါပဲ။ သူက ထူးခြားတဲ့ဖြစ်စဉ်တစ်ခုပါပဲ။ သူ့မှာ အရည်အချင်းတွေ အများကြီးရှိတော့ သူနဲ့တွဲကစားရတာ အရမ်းလွယ်ကူပါတယ်။ ဒါက အခွင့်ထူးတစ်ခုပါ” လို့ သူက ကိန်းကို ချီးကျူးခဲ့ပါတယ်။
Photo Credit : Super Sport
ကိန်းကလည်း ဒီယက်ဇ်ကို ပြန်လည်ချီးကျူးခဲ့ပြီး “ဒီယက်ဇ်က တစ်ဦးချင်းတွေ့ဆုံမှုတွေမှာ ဘယ်လောက်ကောင်းလဲဆိုတာ သင်တို့မြင်နိုင်ပါတယ်။ သူက အရမ်းထက်မြက်ပြီး လျင်မြန်ဖျတ်လတ်တယ်။ သူ့ရဲ့ဂိုးက ပြေးဝင်ပုံရော အဆုံးသတ်ပုံရော အရမ်းကောင်းခဲ့တယ်။ ကလပ်အသင်းသစ်အတွက် ပထမဆုံးပြိုင်ပွဲမှာ အနိုင်ဂိုးသွင်းနိုင်ခဲ့တာက သူ့အတွက် ပြီးပြည့်စုံတဲ့ အစတစ်ခုပါပဲ။” လို့ ပြောကြားခဲ့ပါတယ်။
ဘိုင်ယန်မြူးနစ်အသင်းဟာ သူတို့ရဲ့ ဘွန်ဒက်စ်လီဂါ ရာသီသစ်အဖွင့်ပွဲစဉ်ကို လာမယ့် သြဂုတ်လ (၂၂)ရက်နေ့မှာ လိုက်ပ်ဇစ်အသင်းနဲ့ အိမ်ကွင်းမှာ ယှဉ်ပြိုင်ကစားရမှာဖြစ်ပြီး ကိန်းနဲ့ ဒီယက်ဇ်တို့ နှစ်ဦးစလုံးဟာ သူတို့ရဲ့ ရာသီအစ ခြေစွမ်းကောင်းကို အဲ့ဒီပွဲမှာ ဆက်လက်ထိန်းသိမ်းသွားနိုင်ဖို့ မျှော်လင့်နေကြပါတယ်။
