အသက်(၄၀)နား ကပ်လာနေပြီ ဖြစ်ပေမယ့်လည်း ကစားသမားဘဝကနေ အနားမယူသေးပဲ ဘောလုံးဆက်ကစားနေဆဲဖြစ်တဲ့ အေစီမီလန်အသင်းရဲ့ ဝါရင့်တိုက်စစ်ကစားသမားကြီး ဇလာတန်အီိဗရာဟီမိုဗစ်ဟာ World Class အဆင့်ရှိ တိုက်စစ်မှူးတစ်ယောက်ဖြစ်သလို ပြိုင်ဘက်ကစားသမားတွေသာမက အသင်းဖော်တွေပါ သတိထားဆက်ဆံရတဲ့ လူကြမ်းကြီးတစ်ယောက်လည်း ဖြစ်ပါတယ်။

Photo Credit : The Sun

ဆွီဒင် ဝါရင့်တိုက်စစ်မှူးကြီး အီဗရာဟီမိုဗစ်ဟာ နယ်သာလန် ထိပ်သီးကလပ် အေဂျက်စ်အသင်းမှာ သူရဲ့စီနီယာကစားသမားဘဝကို စတင်နိုင်ခဲ့တာဖြစ်ပြီး အေဂျက်စ်မှာ ပါဝင်ကစားနေစဉ်တုန်းက မိုဗစ်နဲ့ (၂)နှစ်နီးပါးလောက် တွဲဖက်ကစားခဲ့ဖူးတဲ့ နယ်သာလန် နောက်ခံကစားသမားဟောင်း ဗန်ဒါမေဒီက မိုဗစ်နဲ့ သူရဲ့ကြား အမှတ်တရတွေ ရှိခဲ့တဲ့အကြောင်းကို ပြန်လည်ပြောဆိုသွားခဲ့ပါတယ်။ ဗန်ဒါမေဒီက “ကျွန်တော်တို့နှစ်ယောက် အေဂျက်စ်အသင်းမှာ ပါဝင်ကစားခဲ့ကြတုန်းက အသင်းရဲ့ဘတ်စ်ကားမှာဆိုရင် ကျွန်တော်က အမြဲတမ်းလိုလို မိုဗစ်ရဲ့ ဘေးမှာပဲ ထိုင်နေကြပါ”

Photo Credit : The Sun

“တစ်ကြိမ်မှာတော့ အသင်းဘတ်စ်ကားပေါ် သူအိပ်ပျော်နေတုန်း ကျွန်တော် သူ့ကို စနောက်ဖို့အတွက် သူရဲ့ပါးစပ်ကို နမ်းလိုက်မိတယ်။ ခဏလောက်ကြာတော့ လက်ဝါးခပ်ပြင်းပြင်း (၂)ချက်က ကျွန်တော့်ဆီကို ရောက်လာပါရောပဲ” လို့ ထုတ်ဖော်ပြောဆိုခဲ့ပါတယ်။ ဒါ့အပြင် ၂၀၁၉ခုနှစ်တုန်းက FourFourTwo နဲ့ ပြုလုပ်ခဲ့တဲ့ အင်တာဗျူးတစ်ခုမှာလည်း မိုဗစ်က သူ့ကို ခြေထောက်ချိုးပစ်မယ်လို့ ခြိမ်းခြောက်ခဲ့ဖူးကြောင်းကို ဗန်ဒါမေဒီက ပြောဆိုခဲ့ပါသေးတယ်။ ဒီကိစ္စနဲ့ပတ်သက်ပြီး ဗန်ဒါမေဒီက “သူ ကျွန်တော့်ကို ဒီလိုပြောခဲ့ဖူးတာဆိုတာ မှန်ပါတယ်။ ဒါပေမယ့် ဇလာတန်က လူတိုင်းနီးပါးကို ဒီအတိုင်း ပြောခဲ့ဖူးတာပါ။ ကျွန်တော်တို့နှစ်ယောက်ရဲ့ကြားမှာလည်း မပြေလည်တဲ့ အခိုက်အတန့်တွေ ရှိခဲ့တယ်ဆိုတာကလည်း မှန်ပါတယ်” လို့ ပြောဆိုခဲ့ပါသေးတယ်။ ဒါတွေအပြင် အေဂျက်စ်လူငယ်အသင်းကနေ စတင်ပြီး မိုဗစ်နဲ့ အသင်းဖော်တွေ ဖြစ်ခဲ့ဖူးတဲ့ နယ်သာလန် ကွင်းလယ်ကစားသမားဟောင်း ဗန်ဒါဗတ်ကလည်း အဲ့ဒီအချိန်တုန်းက သူနဲ့ မိုဗစ်တို့ကြားမှာ ရင်းနှီးတွေ ဆက်ဆံရေးတွေ ရှိမနေခဲ့တဲ့အပြင် မိုဗစ်က သူ့ကို မနာလိုသလိုတောင် ဖြစ်နေတယ်လို့ ပြောဆိုခဲ့ဖူးပါတယ်။ လက်ရှိမှာတော့ မိုဗစ်ဟာ မနှစ်က ဘောလုံးရာသီအတွင်း ရရှိထားခဲ့တဲ့ ဒူးဒဏ်ရာပြသာနာကြောင့် အနားယူနေရလျက်ရှိပြီး ယူရို-၂၀၂ဝပြိုင်ပွဲကိုလည်း လွဲချော်ထားခဲ့ရပါတယ်။