ဒိန်းမတ် တိုက်စစ်ကစားသမား ရက်စ်မတ် ဟွိုင်လန်းဟာ မနေ့ညက ပေါ်တူဂီအသင်းနဲ့ ရင်ဆိုင်ခဲ့ရတဲ့ UEFA Nations League ကွာတားဖိုင်နယ်ပွဲမှာ သွင်းဂိုးသွင်းယူအပြီး ခရစ္စတီယာနို ရော်နယ်လ်ဒိုရဲ့ Siu ပုံစံနဲ့ အောင်ပွဲခံခဲ့ပေမယ့် ရော်နယ်လ်ဒိုဟာ သူ့အတွက်တော့ အရာအားလုံးပဲလို့ ဖွင့်ဟ ပြောဆိုသွားခဲ့ပါတယ်။
မန်ချက်စတာ ယူနိုက်တက် တိုက်စစ်မှူး ဟွိုင်လန်းဟာ မနေ့ညက ဒိန်းမတ်နဲ့ ပေါ်တူဂီတို့ပွဲစဉ်မှာ ဒိန်းမတ်ရဲ့ ပွဲထွက်ကစားသမားစာရင်းမှာ ပါဝင်လာခဲ့ရခြင်း မရှိပေမယ့်လည်း ဒုတိယပိုင်း ပွဲကစားချိန် မိနစ်(၇၀)လောက်မှာ ပါဝင်ကစားခွင့် ရခဲ့ပြီး ကစားချိန် (၁၀)မိနစ်မပြည့်ခင်မှာပဲ ဒိန်းမတ်အတွက် လိုအပ်နေတဲ့ ဦးဆောင်ဂိုးကို သွင်းယူပေးခဲ့ပါတယ်။
Photo Credit : Daily Mail
တကယ်တော့ ဒိန်းမတ်က ပထမပိုင်းမှာပဲ ပင်နယ်တီ ကန်သွင်းခွင့် ရရှိခဲ့ပေမယ့်လည်း ဒါကို ကွင်းလယ်လူ အဲရစ်ဆင်က ဂိုးအဖြစ် မပြောင်းလဲနိုင်ခဲ့လို့ နစ်နာခဲ့ရပါတယ်။ ဒါပေမယ့်လည်း ဟွိုင်လန်းကတော့ အသင်းအတွက် သွင်းဂိုးကို သွင်းယူနိုင်ခဲ့ပြီး ဒီဂိုးကို သွင်းယူပြီးချိန်မှာလည်း ရော်နယ်လ်ဒိုရဲ့ Siu ပုံစံနဲ့ပါ အောင်ပွဲခံသွားခဲ့ပါတယ်။
ဘောလုံးလောကရဲ့ အထင်ကရ ကစားသမားကြီးဖြစ်တဲ့ ရော်နယ်လ်ဒိုရဲ့ Siu အောင်ပွဲခံမှုပုံစံဟာ ဘောလုံးသမားတိုင်း လိုက်လုပ်တက်ကြတဲ့ အောင်ပွဲခံမှုမျိုး ဖြစ်သလို တချို့ဆိုရင်လည်း ရော်နယ်လ်ဒို ပါဝင်နေတဲ့ အသင်းနဲ့ ရင်ဆိုင်ရချိန် ဂိုးသွင်းတဲ့အခါ ရော်နယ်လ်ဒိုကို လှောင်ပြောင်ဖို့အတွက် Siu ပုံစံနဲ့ အောင်ပွဲခံတက်ကြပါတယ်။ ဒါပေမယ့် ဟွိုင်လန်းကတော့ “အခု ကျွန်တော် ချဲ့ကားပြောမှာ မဟုတ်ပါဘူး။”
Photo Credit : Daily Mail
“ဒါပေမဲ့ ခရစ္စတီယာနိုဟာ ကျွန်တော့်အတွက် အရာအားလုံးပါပဲ။ ကျွန်တော်ဟာ ခရစ္စတီယာနိုကြောင့် ဘောလုံးကို ချစ်မိသွားတာပါ။ ခရစ္စတီယာနိုကြောင့် မန်ချက်စတာ ယူနိုက်တက်ပရိသတ် ဖြစ်လာခဲ့တာပါ။ ကျွန်တော်ဟာ ခရစ္စတီယာနိုကြောင့် ကိုယ့်ဘာသာကိုယ် လေ့ကျင့်တာကို စတင်ခဲ့တာပါ။ အိပ်ရာမဝင်ခင် နေ့တိုင်း လက်ထောက်ထောက်ထိုင်ထနဲ့ ဗိုက်သားလေ့ကျင့်ခန်းတွေ လုပ်တာကို ခရစ္စတီယာနိုကြောင့် စတင်ခဲ့တာပါ။ ခရစ္စတီယာနို ဖြစ်ချင်လို့ပါ” လို့ ရှင်းလင်း ပြောဆိုသွားခဲ့ပါတယ်။
အသက်(၂၂)နှစ်အရွယ် ဒိန်းမတ်တိုက်စစ်မှူး ဟွိုင်လနး်ဟာ ငယ်စဉ်ကတည်းက မန်ယူနိုက်တက်အသင်းကို အားပေးခဲ့တဲ့ အမာခံ ပရိသတ်တစ်ဦးဖြစ်ပြီး မနှစ်က နွေရာသီမှာပဲ အတ္တလန်တာအသင်းကနေ ယူနိုက်တက်အသင်းဆီ ပြောင်းရွှေ့ကြေး ပေါင်(၇၂)သန်းနဲ့ ပြောင်းရွှေ့ရောက်ရှိလာခဲ့တာဖြစ်ကာ အခုဆိုရင် ဟွိုင်လန်းက ယူနိုက်တက် ကစားသမားဘဝ ဒုတိယရာသီကို ဖြတ်သန်းနေပါတယ်။
