မန်ချက်စတာ ယူနိုက်တက်အသင်းရဲ့ တောင်ပံကစားသမား အယ်လက်ဟန်ဒရို ဂါနာချိုဟာ သူဝယ်ယူထားတဲ့ ပေါင် (၃.၉)သန်းတန် အိမ်ကြီးကို တစ်နှစ်အကြာမှာ ပြန်လည်ရောင်းချဖို့ လုပ်ဆောင်နေတာကြောင့် သူ့ရဲ့အနာဂတ်နဲ့ ပတ်သက်ပြီး ကောလဟာလ သတင်းတွေ ထွက်ပေါ်လာခဲ့ပါတယ်။
ဂါနာချိုဟာ ဘိုဒန်မြို့မှာရှိတဲ့ ဒီအိမ်ကို ပြီးခဲ့တဲ့ ဧပြီလမှ ဝယ်ယူခဲ့တာဖြစ်ပြီး အခုလို ပြန်ရောင်းချဖို့ လုပ်ဆောင်နေတာဟာ လာမယ့်နွေရာသီမှာ ယူနိုက်တက်ကနေ ထွက်ခွာဖို့ အရိပ်အမြွက်ပြနေသလို ဖြစ်နေတယ်လို့ Daily Mail သတင်းဌာနက ဖော်ပြပါတယ်။ ဒါပေမဲ့ အဆိုပါသတင်းမှာပဲ ဂါနာချိုဟာ အသင်းကနေ ထွက်ခွာလိုစိတ်မရှိဘူးလို့ နီးစပ်သူတွေက ငြင်းဆိုထားကြောင်းလည်း ဖော်ပြထားပါတယ်။
Photo Credit : Goal
သတင်းအရ ဂါနာချိုဟာ သူ့ရဲ့ညီအစ်ကိုနဲ့ တခြားမိသားစုဝင်တွေ အင်္ဂလန်မှာ အချိန်ပြည့်နေထိုင်တုန်းက အဲဒီအိမ်ကို ဝယ်ယူခဲ့တာလို့ သိရပါတယ်။ အခုတော့ သူတို့မိသားစုတွေ စပိန်နိုင်ငံကို ပြန်သွားကြပြီ ဖြစ်တာကြောင့် သူနဲ့ သူ့ရဲ့ဇနီးဖြစ်သူ အီဗာတို့အတွက် သေးငယ်တဲ့ နေထိုင်စရာ နေရာတစ်ခုကို ရှာဖွေနေတာကြောင့် အခုလို အိမ်ရောင်းဖို့ လုပ်ဆောင်တာ ဖြစ်နိုင်တယ်လို့ သတင်းမှာ ဆက်လက်ဖော်ပြထားပါတယ်။
ဂါနာချိုဟာ ပြီးခဲ့တဲ့ ဇန်နဝါရီလမှာလည်း ယူနိုက်တက်ကနေ ထွက်ခွာဖို့ နီးစပ်ခဲ့ပြီး နာပိုလီနဲ့ ချယ်လ်ဆီးအသင်းတို့က သူ့ကို ခေါ်ယူဖို့ စိတ်ဝင်စားခဲ့ကြတယ်လို့ သတင်းတွေ ထွက်ပေါ်ခဲ့ဖူးပါတယ်။ လက်ရှိမှာလည်း ယူနိုက်တက်အသင်းဟာ လာမယ့်နွေရာသီမှာ ကစားသမားသစ်တွေ ခေါ်ယူဖို့အတွက် ရန်ပုံငွေရှာဖွေဖို့ လိုအပ်နေတာကြောင့် ဂါနာချိုကို ရောင်းချဖို့ဆိုတဲ့ အစီအစဉ်ဟာ ပြန်လည် ပေါ်ပေါက်လာနိုင်တယ်လို့ သုံးသပ်မှုတွေလည်း ရှိနေပါတယ်။
Photo Credit : FotbolDirekt
ဒါပေမဲ့ လက်ရှိအချိန်မှာတော့ ဂါနာချိုဟာ ရာသီကုန်အထိ ယူနိုက်တက်ရဲ့ မျှော်လင့်ချက်တွေအတွက် အဓိက ကစားသမားတစ်ဦးအဖြစ် ရှိနေပါတယ်။ သူ့အနေနဲ့ လာမယ့်တနင်္ဂနွေနေ့မှာ ကစားမယ့် မန်ချက်စတာဒါဘီပွဲနဲ့ နောက်တစ်ပတ်မှာ ယှဉ်ပြိုင်ရမယ့် ယူရိုပါလိဂ် ကွာတားဖိုင်နယ် ပထမအကျော့ လိုင်ယွန်နဲ့ပွဲတို့မှာ ခြေစွမ်းပြဖို့ အားခဲထားမှာ သေချာပါတယ်။
အသက်(၂၀)အရွယ် အာဂျင်တီးနား တောင်ပံကစားသမား ဂါနာချိုဟာ ဒီနှစ်ဘောလုံးရာသီမှာ ယူနိုက်တက်အသင်းအတွက် ပြိုင်ပွဲစုံ (၄၆)ပွဲအထိ ပါဝင်ကစားပေးထားခဲ့ရင်း (၉)ဂိုး သွင်းယူပြီး (၈)ဂိုးအထိ ဖန်တီးထားနိုင်ပေမယ့် သူရဲ့ စွမ်းဆောင်ရည်က တသမတ်တည်းမှာ ရှိမနေတာ ပြောစရာတစ်ခုလို ဖြစ်နေရပါတယ်။
