အသက် ၄၁ နှစ်အရွယ် Cristiano Ronaldo ရဲ့ ဂိုးသွင်းခြေစွမ်း မမှိန်သေးပါဘူး။ Saudi Pro League မှာ Al-Kholood နဲ့ တွေ့ဆုံတဲ့ပွဲမှာ ဟက်ထရစ်ပြပြီး Al-Nassr ကို ၅-၃ နဲ့ အနိုင်ရစေခဲ့သလို ကိုယ်ပိုင်ဂိုးစုစုပေါင်းကိုလည်း ၉၈၅ ဂိုးအထိ တိုးမြှင့်လိုက်ပါတယ်။ ဂိုး ၁၀၀၀ မှတ်တိုင်ကို ရောက်ဖို့ ၁၅ ဂိုးသာ လိုပါတော့တယ်။
ပွဲစဉ်က Al-Nassr ဘက်က Angelo Gabriel နဲ့ Sadio Mane တို့ ဂိုးတွေကြောင့် ၂-၂ နဲ့ တင်းမာနေချိန်မှာ ဒုတိယပိုင်း ၁၅ မိနစ်အတွင်း Ronaldo က သုံးဂိုးဆက်တိုက် သွင်းယူပြီး အောင်ပွဲကို သေချာစေခဲ့တာပါ။ ပေါ်တူဂီ အသင်းဖော် Joao Felix ကလည်း ဂိုးဖန်တီးမှု လေးကြိမ်တောင် လုပ်ပေးခဲ့ပြီး အဲဒီထဲက နှစ်ကြိမ်က Ronaldo ရဲ့ ဂိုးတွေ ဖြစ်ပါတယ်။
ဒါဟာ Ronaldo ရဲ့ ကစားသက်တစ်လျှောက် ၆၇ ကြိမ်မြောက် ဟက်ထရစ် ဖြစ်ပါတယ်။ Real Madrid မှာ ၄၄ ကြိမ်၊ ပေါ်တူဂီ အမျိုးသားအသင်းမှာ ၁၀ ကြိမ်၊ Al-Nassr မှာ ၇ ကြိမ်၊ Manchester United နဲ့ Juventus မှာ သုံးကြိမ်စီ ဟက်ထရစ် ရယူခဲ့ပါတယ်။ Ballon d'Or ငါးကြိမ်ဆုရှင်ဟာ အင်္ဂလန်၊ စပိန်၊ အီတလီနဲ့ ဆော်ဒီအာရေးဗီးယား လိဂ်ဖလားတွေ ရယူထားပြီး အမျိုးသား နိုင်ငံတကာပွဲတွေမှာ အများဆုံးဂိုးသွင်းသူလည်း ဖြစ်ပါတယ်။
Al-Nassr မှာ လေးနှစ်နီးပါး ကစားခဲ့ပြီဖြစ်တဲ့ Ronaldo ရဲ့ စာချုပ်က တစ်နှစ်သာ ကျန်ပါတော့တယ်။ သြဂုတ်လတုန်းက ဒီနှစ်ဟာ သူ့အတွက် နောက်ဆုံးကစားမယ့်နှစ် “ဖြစ်နိုင်တယ်” လို့ အငြိမ်းစားယူမယ့် အရိပ်အမြွက် ပြခဲ့ပါသေးတယ်။ လက်ရှိမှာ Al-Nassr ဟာ ဇယားဒုတိယနေရာမှာ ရှိပြီး ထိပ်ဆုံးက Al-Qadsiah ထက် ပွဲတစ်ပွဲ လျော့ကစားထားတာကြောင့် ဖလားလုပွဲ ဆက်ပြီး ပြင်းထန်ဦးမှာပါ။
Photo: Abigail Keenan / Unsplash
