မန်ချက်စတာ ယူနိုက်တက်အသင်းရဲ့ အသင်းခေါင်းဆောင် ကွင်းလယ်ကစားသမား ဘရူနို ဖာနန်ဒက်စ်က တော့တင်ဟမ် ဟော့စပါး ၊ ပေါ်တိုအသင်းတို့နဲ့ ရင်ဆိုင်ခဲ့ရတဲ့ ပွဲစဉ်တွေမှာ (၂)ပွဲဆက်တိုက် အနီကတ်ပြ ထုတ်ပယ်ခံခဲ့ရပြီး ကစားသမားဘဝရဲ့ အခက်ခဲဆုံး ကာလတွေကို ဖြတ်သန်းနေရတယ်လို့ ထုတ်ဖော် ပြောဆိုသွားခဲ့ပါတယ်။
ယူနိုက်တက်အသင်းရဲ့ အဓိက ကစားသမား ဖာနန်ဒက်စ်ဟာ ဒီရာသီမှာ ပုံမှန်ခြေစွမ်းကောင်းတွေ ပြသနိုင်ဖို့ ရုန်းကန်နေရတဲ့အပြင် စပါးနဲ့ ပရီးမီးယားလိဂ်ပွဲ ပေါ်တိုနဲ့ ယူရိုပါလိဂ်ပွဲတွေမှာပါ အနီကတ်တွေ ဆက်တိုက် ပြသခံခဲ့ရပြီး ထုတ်ပယ်ခံခဲ့ရပါသေးတယ်။
Photo Credit : The Sun
စပါးနဲ့ပွဲစဉ်မှာ ပြသခံခဲ့ရတဲ့ တိုက်ရိုက် အနီကတ်ကတော့ အယူခံအောင်မြင်ခဲ့ပြီး ပယ်ဖျက်ခံလိုက်ရလို့ (၃)ပွဲပယ် ပြစ်ဒဏ်ကနေ ကင်းလွတ်သွားခဲ့ရပမယ့် ပေါ်တိုနဲ့ပွဲမှာ ပြသခံရတဲ့ အနီကတ်ကတော့ (၂)ဝါ(၁)နီဖြစ်တာကြောင့် ဖီနာဘာချီအသင်းနဲ့ ယှဉ်ပြိုင်ရမယ့် ယူရိုပါလိဂ်ပွဲစဉ်ကို လွဲချော်သွားရပါတော့မယ်။
ဒီလို အခြေအနေတွေအပေါ်မှာ ဖာနန်ဒက်စ်က “အသင်းတစ်သင်းအနေနဲ့ ခက်ခဲတဲ့ အခိုက်အတန့်တွေ ကြုံနေရပြီး ဒါတွေက ကျွန်တော့်အတွက်ဆိုရင်လည်း အခက်ခဲဆုံးတွေထဲက တစ်ခုပါ။ ကလပ်အသင်းမှာ (၅)နှစ်နီးပါး အတက်အကျတွေ အဆိုးအကောင်းတွေ ရှိခဲ့ပါတယ်။ ကျွန်တော်ရဲ့ ကစားသမားဘဝ တစ်လျှောက်လုံးမှာ စိန်ခေါ်မှုတွေ အခက်အခဲတွေ အမြဲရှိခဲ့ပြီး”
Photo Credit : Transfermarket
“ခက်ခဲနေတဲ့ အချိန်တွေမှာ တာဝန်တွေကနေ တိတ်ဆိတ်နေလိုက်တာ ပုန်းကွယ်နေလိုက်တာမျိုးတော့ တစ်ခါမှ မဖြစ်ခဲ့ဖူးပါဘူး။ ဒါက ဖန်တစ်ရာတေနေတဲ့ စကားလို့ ထင်မြင်နိုင်ပေမယ့် ယူနိုက်တက် ပရိသတ်အများစုကတော့ အဲ့ဒါကို ငြီးငွေ့နေလိမ့်မယ်။”
“ဒါပေမယ့် ကျွန်တော့်ထက်တော့ ဘယ်သူကမှ ပိုပြီး စိတ်ပျက်မှာ မဟုတ်ပါဘူး။ ဒီလို အခိုက်အတန့်မျိုးမှာတောင် ကျွန်တော်နဲ့ အသင်းဖော်တွေအပေါ် အပြုသဘောဆောင်တဲ့ ယုံကြည်ချက်တွေ ပေးခဲ့သူအားလုံးကို အထူး ကျေးဇူးတင်ပါတယ်။” လို့ ပြောဆိုလိုက်ပါတယ်။ ဖာနန်ဒက်စ်ဟာ စပါးနဲ့ပွဲက ပြသခံရတဲ့ အနီကတ်ပြစ်ဒဏ်ကနေ ကင်းလွတ်သွားပြီဖြစ်လို့ ဗီလာနဲ့ပွဲကို ပါဝင်ကစားနိုင်တော့မှာပဲ ဖြစ်ပါတယ်။
