အာဆင်နယ်အသင်းရဲ့ အဓိက ကစားသမား ကွင်းလယ်လူ ဒက်ကလန် ရိုက်စ်က ဒီနှစ်ဘောလုံးရာသီမှာ သူတို့အသင်းက လွဲချော်မှုတွေ အကြိမ်ပေါင်းများစွာ ရှိခဲ့တယ်လို့ ဝန်ခံ ပြောဆိုလိုက်ပေမယ့် ရာသီကျန်တဲ့အထိ အသင်းရဲ့ အလားအလာအပေါ် အကောင်းမြင်နေဆဲ ဖြစ်တယ်လို့လည်း အခိုင်အမာ ပြောကြားခဲ့ပါတယ်။
အာဆင်နယ်ရဲ့ အင်္ဂလန် လက်ရွေးစင် ကွင်းလယ်သမား ရိုက်စ်က “ဒီရာသီမှာ ကျွန်တော်တို့ လွဲချော်မှုတွေက အကြိမ်များသွားပြီ။” လို့ ဝန်ခံခဲ့ပြီး လီဗာပူးအသင်းကိုတော့ ရာသီအဆုံးထိ ဖိအားပေးသွားမယ်လို့ ကတိပြုခဲ့ပါတယ်။ နည်းပြ မီခယ်လ် အာတီတာရဲ့ အသင်းဟာ ချန်ပီယံဆုအတွက် ပြိုင်ဆိုင်မှုမှာ စုစုပေါင်း ရမှတ် (၁၂)မှတ်အထိတောင် အမှတ်ပြတ်နေခဲ့ရပြီပဲ ဖြစ်ပါတယ်။
Photo Credit : Sky Sports
ဒါပေမယ့် ရိုက်စ်ကတော့ လီဗာပူးရဲ့ အမှတ်ပေးဇယားထိပ်ဆုံးက ဦးဆောင်မှုဟာ သူတို့အသင်းကို မထိခိုက်ဘူးလို့ ဆိုပါတယ်။ သူတို့အနေနဲ့ ထိန်းချုပ်နိုင်တာတွေကို အာရုံစိုက်ပြီး ပွဲတွေကို တတ်နိုင်သမျှ အနိုင်ယူဖို့ပဲ ရည်ရွယ်ထားတယ်လို့ ပြောပါတယ်။ အာဆင်နယ်ဟာ ဒီရာသီမှာ (၁၀)ပွဲအထိ သရေကျခဲ့ပြီး (၃)ပွဲ ရှုံးထားတာကြောင့် အမှတ်တွေ အများကြီး လွဲချော်ခဲ့တယ်လို့ ရိုက်စ်က ဝန်ခံခဲ့ပေမယ့် လီဗာပူးကို ဆက်တိုက် ဖိအားပေးသွားမယ်လို့ ကတိပြုခဲ့ပါတယ်။
“ကျွန်တော်တို့ အမှတ်ပေးဇယားမှာ သူတို့နောက်မှာပဲ ရှိနေတာကို သိပါတယ်။ ကျွန်တော်တို့ ထိန်းချုပ်နိုင်တာက ကျွန်တော်တို့ရဲ့ လက်ကျန် (၈)ပွဲကို အနိုင်ရဖို့ပဲ ဖြစ်ပါတယ်။ ဒီရာသီမှာ ကျွန်တော်တို့ လွဲချော်မှုတွေ အကြိမ်များသွားပြီ။ ဒါပေမယ့် သူတို့ကို ဆက်လိုက်ဖမ်းပြီး ဖိအားပေးသွားမှာပါ။ ဒါပဲ ကျွန်တော်တို့ လုပ်နိုင်တာပါ” လို့ ရိုက်စ်က BBC Sport ကို ပြောခဲ့ပါတယ်။
Photo Credit : The Mirror
ဒက်ကလန် ရိုက်စ်ဟာ ဒီရာသီမှာ အာဆင်နယ်အသင်းအတွက် အမြဲလိုလို ပါဝင်ကစားနေရသူဖြစ်ပြီး ပရီးမီးယားလိဂ် ပွဲပေါင်း(၃၀)မှာလည် (၂၆)ပွဲအထိတောင် ပါဝင်ခဲ့ပြီး ပြိုင်ပွဲအားလုံးမှာဆိုရင် (၄၁)ပွဲ ကစားခဲ့ကာ (၅)ဂိုးသွင်းပြီး (၈)ဂိုး ဖန်တီးပေးထားခဲ့ပါတယ်။
အင်္ဂလန်ကြယ်ပွင့်တစ်ဦးဖြစ်တဲ့ ရိုက်စ်ဟာ ချန်ပီယံလိဂ်ကိုလည်း အာရုံစိုက်ထားပြီး အာဆင်နယ်ဟာ ကွာတားဖိုင်နယ်မှာ ရီးယဲလ်မက်ဒရစ်နဲ့ ရင်ဆိုင်ရမယ့် နှစ်ကျော့ပွဲအတွက် ပြင်ဆင်နေပါတယ်။ ရိုက်စ်က အသင်းအနေနဲ့ ဒီရာသီမှာ အောင်မြင်မှုတွေ ရယူနိုင်မယ်လို့ အပြည့်အဝ ယုံကြည်မှု ရှိရမယ်လို့လည်း ဆိုပါသေးတယ်။
