မန်ချက်စတာ စီးတီးအသင်းရဲ့ ကွင်းလယ်ဖန်တီးရှင် အဓိက ကစားသမားဖြစ်သူ ကယ်လ်ဗင် ဒီဘရိုင်းဟာ ဒီနှစ်ဘောလုံးရာသီအကုန်မှာ မန်စီးတီးအသင်းနဲ့ ချုပ်ဆိုထားတဲ့ စာချုပ်သက်တမ်းလည်း ကုန်ဆုံးတော့မှာဖြစ်ပြီး သူ့အနေနဲ့လည်း အသင်းကနေ ထွက်ခွာသွားတော့မှာ ဖြစ်တယ်လို့ အတည်ပြု ထုတ်ပြန်လိုက်ပါတယ်။

လက်ရှိမှာ အသက်(၃၃)နှစ်အရွယ် ရှိနေပြီဖြစ်တဲ့ ဘယ်လ်ဂျီယံ လက်ရွေးစင် ကွင်းလယ်တိုက်စစ်ကစားသမား ဒီဘရိုင်းဟာ လွန်ခဲ့တဲ့ ၂၀၁၅ကတည်းက မန်စီးတီးအသင်းဆီ ရောက်ရှိနေခဲ့တာဖြစ်ပြီး အသင်းမှာ ဆယ်စုနှစ်တစ်ခုထိ ပါဝင်ကစားပြီးနောက်မှာတော့ အသင်းနဲ့ လမ်းခွဲဖို့ အကြောင်းဖန်လာခဲ့ပါတယ်။

Photo Credit : The New York Times

ချယ်လ်ဆီးမှာ နေရာမရခဲ့လို့ ဝါဒါဘရီမင်နဲ့ ဝုလ်ဖ်ဘတ်လို ဂျာမနီ ကလပ်တွေဆီ ရောက်ခဲ့ရင်း ဝုလ်ဖ်ဘတ်မှာ တောက်ပခဲ့တာကြောင့် မန်စီးတီးအသင်းဆီပါ ပြောင်းခဲ့ရတဲ့ ဒီဘရိုင်းဟာ မန်စီးတီးအတွက် အဓိက အကျဆုံး ကစားသမားတစ်ယောက်အဖြစ် အသုံးတော်ခံပြခဲ့ပြီး အောင်မြင်မှုများစွာ ရယူပေးနိုင်ခဲ့ပါတယ်။

ဒီဘရိုင်းဟာ ၂၀၁၅ခုနှစ်ကနေ စတင်ပြီး မန်စီးတီးအသင်းအတွက် ဘောလုံးရာသီ (၁၀)ရာသီအထိ ပါဝင်ကစားပေးခဲ့ရင်း (၄၁၃)ပွဲကစား (၁၀၆)ဂိုးသွင်း (၁၇၄)ဂိုး ဖန်တီပေးနိုင်ခဲ့တဲ့အပြင် အသင်းနဲ့အတူ သမိုင်းဝင် တစ်ရာသီတည်း ဆုဖလား(၃)လုံး Treble Champions ဖြစ်ခဲ့သလို ဆုဖလား (၁၆)လုံးအထိလည်း ပိုင်ဆိုင်ခဲ့ပါတယ်။

Photo Credit : Goal

မန်စီးတီးအတွက် ဂန္တဝင် ကစားသမားတစ်ဦးလို အကောင်းဆုံး စွမ်းဆောင်နိုင်ခဲ့တဲ့ ဒီဘရိုင်းဟာ ၂၀၂၅ နွေမှာတော့ မန်စီးတီးကို စွန့်ခွာပြီး သူ့အတွက် စိန်ခေါ်မှုအသစ်တွေ စောင့်ကြိုနေမယ့် နေရာသစ်တစ်ခုဆီ ပြောင်းရွှေ့သွားဖို့ ရှိနေပါတယ်။ ဒီဘရိုင်းကို မေဂျာလိဂ်နဲ့ ဆော်ဒီလိဂ် ကလပ်အသင်းတွေက အပြိုင်အဆိုင် စိတ်ဝင်စားနေကြပါတယ်။

ဒီဘရိုင်းကိုယ်တိုင်ကတော့ လက်ရှိမှာ မန်စီးတီးနဲ့ လက်ကျန် ဘောလုံးရာသီကိုသာ ပိုမို အာရုံစိုက်ထားဦးမှာဖြစ်ပြီး အသင်းကို ချန်ပီယံလိဂ်ဝင်ခွင့် ရရှိဖို့နဲ့ အက်ဖ်အေဖလားပြိုင်ပွဲ ချန်ပီယံဖြစ်အောင် စွမ်းဆောင်ပေးပြီးမှသာ သူ့အတွက် ကလပ်အသင်းသစ်ကို စိတ်တိုင်းကျ ရွေးချယ်သွားဖွယ် ရှိနိုင်ပါတယ်။