ဘာစီလိုနာအသင်းဟာ ဒီနွေမှ ခေါ်ယူထားတဲ့ စပိန် ကွင်းလယ်တိုက်စစ်ကစားသမား ဒါနီ အော်လ်မိုကို လက်ကျန် ရာသီဝက်အတွက် ကစားသမား မှတ်ပုံတင်ဖို့ ကြိုးပမ်းခဲ့ရာ ပယ်ချလိုက်ခံရတာကြောင့် အော်လ်မိုအနေနဲ့ ဒီရာသီရဲ့ လက်ကျန် ရာသီဝက်တစ်ခုလုံး အသင်းမှာ ကစားပေးခွင့် မရတော့မယ့် အခြေအနေမျိုးနဲ့ ရင်ဆိုင်နေရပါတယ်။
ဘာစီလိုနာက ယူရို-၂၀၂၄ ပြိုင်ပွဲကြီးအပြီးမှာ ယူရိုချန်ပီယံ စပိန်အသင်းရဲ့ အဓိက ကစားသမားတွေဖြစ်တဲ့ တောင်ပံကစားသမား နီကို ဝီလီယံစ်နဲ့ ကွင်းလယ်တိုက်စစ်ကစားသမား အော်လ်မိုတို့ကို ပစ်မှတ်ထားခဲ့ရင်း နောက်ဆုံးမှာတော့ အော်လ်မိုကို လိုက်ပ်ဇစ်ကနေ အရ ခေါ်ယူလိုက်နိုင်ခဲ့ပါတယ်။
Photo Credit : Barca Universal
အသက်(၂၆)နှစ်အရွယ် လာမာစီယာ အကယ်ဒမီထွက် အော်လ်မိုဟာ ဘာစီလိုနာဆီ ရောက်လာလာချင်းမှာပဲ ကစားသမား မှတ်ပုံတင်ကိစ္စကြောင့်ပဲ လာလီဂါ ပွဲစဉ်(၃)မှသာ စတင် ကစားခဲ့ရပါတယ်။ အခုဆိုရင်တော့ အော်လ်မိုက ဘာစီလိုနာအတွက် ပြိုင်ပွဲစုံ (၁၅)ပွဲကစားပြီး (၆)ဂိုးသွင်း (၁)ဂိုးဖန်တီးပေးထားနိုင်ခဲ့ပါတယ်။
အော်လ်မိုကို အသင်းမှာ လက်ကျန် ရာသီဝက်အတွက် မှတ်ပုံတင်ဖို့ ခဲယဉ်းနေချိန် နောက်ခံလူ ခရစ္စတန်ဆန်က ဒဏ်ရာ ပြဿနာ ဖြစ်ပေါ်လာလို့ အော်လ်မိုကို register လုပ်ဖို့ အလားအလာတွေ ရှိလာခဲ့ပေမယ့်လည်း လက်ရှိမှာ ခရစ္စတန်ဆန်က ဒဏ်ရာကနေ သက်သာလာလို့ ခေါင်းခဲစရာ ဖြစ်ခဲ့ရသလို စီးပွားရေး တရားခုံရုံးကနေပါ ဘာစီလိုနာရဲ့ အော်လ်မိုအတွက် register case ကို ပယ်ချလိုက်ပါတော့တယ်။
Photo Credit : ESPN
ဒီလို ပယ်ချခံရမှုကြောင့် ဘာစီလိုနာအနေနဲ့ လာမယ့် (၃၀)ရက်နေ့အထိ နောက်ဆုံးထားပြီး လာလီဂါ တရားရုံးမှာ တရားရင်ဆိုင်မှုအသစ်ကို ထပ်မံ တင်သွင်းသွားရတော့မှာ ဖြစ်ပါတယ်။ ဒါပေမယ့် အဲ့ဒီတစ်ကြိမ်ပါ ထပ်မံ ပယ်ချခံရဦးမယ်ဆိုရင်တော့ အော်လ်မိုဟာ ဒီရာသီရဲ့ လက်ကျန် ရာသီဝက်တစ်ခုလုံး ဘာစီလိုနာအတွက် ကစားပေးခွင့် မရှိတော့မှာ ဖြစ်ပါတယ်။
ဒီလိုအခြေအနေမှာ အော်လ်မိုက တခြားသော အသင်းတစ်သင်းသင်းဆီကို အလွတ်ပြောင်းရွှေ့ကြေးနဲ့ပါ ပြောင်းရွှေ့သွားနိုင်တော့မှာ ဖြစ်ပါတယ်။ လတ်တလောမှာတော့ အော်လ်မိုရဲ့ အခြေအနေကို မန်ချက်စတာ နှစ်သင်းလုံးက စောင့်ကြည့်နေသလို မကြာသေးခင်ကလည်း မန်စီးတီးနဲ့ အဲဗာတန်တို့ပွဲစဉ်ကို အော်လ်မိုရဲ့ အေးဂျင့်ဖြစ်သူက လာရောက် ကြည့်ရှုသွားပါသေးတယ်။
