ပရီးမီးယားလိဂ် အင်အားကြီးအသင်း တသင်း ဖြစ်တဲ့ ချယ်လ်ဆီးအသင်းဟာ ယခုနှစ် နွေဈေးကွက် အတွင်းမှာ အရန် ဂိုးသမား တဦးကို ခေါ်ယူဖို့ ချိန်ရွယ်နေပြီး လက်ရှိမှာတော့ ပရီးမီးယားလိဂ် ပြိုင်ဘက် မန်ချက်စတာ ယူနိုက်တက်အသင်းနဲ့ လမ်းခွဲထားတဲ့ ဝါရင့် အာဂျင်တီးနား ဂိုးသမား ရိုမဲရိုးကို ခေါ်ယူဖို့ ချိန်ရွယ်နေကြောင်း သိရပါတယ်။

ချယ်လ်ဆီးအသင်းဟာ မန်ဒီ ၊ ကီပါတို့လို လက်စွမ်းကောင်းတဲ့ ဂိုးသမား နှစ်ဦးကို ပိုင်ဆိုင်ထားပေမယ့် အာဖရိကဖလားပြိုင်ပွဲကြောင့် မန်ဒီကို ၁လဝန်းကျင် လက်လွှတ်ရဖို့ ရှိတဲ့ အတွက် အသင်းအတွက် လက်စွမ်း အသင့်အတင့် ရှိတဲ့ အရန်ဂိုးသမား တဦးကို ခေါ်ယူချင်နေတာပါ။

Photo Credit: Standard

လတ်တလောမှာ ချယ်လ်ဆီးအသင်းဟာ အလွတ် ပြောင်းရွှေ့ကြေးနဲ့ ရရှိမယ့် ဂိုးသမားတွေကို လိုက်လံ ရှာဖွေနေပြီး မကြာသေးမီကမှ မန်ချက်စတာ ယူနိုက်တက်အသင်းနဲ့ စာချုပ်သက်တမ်း ကုန်ဆုံးထားတဲ့ ရိုမဲရိုးဟာ သူတို့ရဲ့ ထိပ်သီး ပစ်မှတ်ပဲ ဖြစ်ပါတယ်။

အသက် ၃၄နှစ် အရွယ် အာဂျင်တီးနား ဂိုးသမား ဆာဂျီယို ရိုမဲရိုးဟာ နိုင်ငံတကာ အတွေ့အကြုံ ကြွယ်ဝသလို လက်စွမ်းကောင်းတဲ့ ဂိုးသမား တဦး ဖြစ်ပြီး မန်ချက်စတာ ယူနိုက်တက်အသင်းနဲ့ အက်ဖ်အေဖလား ၊ ယူရိုပါလိဂ်ဖလားတို့ကို အရယူထားနိုင်သူပါ။

Photo Credit: Standard

ဒါကြောင့်ပဲ ချယ်လ်ဆီးအသင်းဟာ ပရီးမီးယားလိဂ် အတွေ့အကြုံရှိတဲ့ ရိုမဲရိုးကို ခေါ်ယူဖို့ မျက်စိကျနေတာ ဖြစ်ပြီး ရိုမဲရိုးကလည်း ချယ်လ်ဆီးအသင်းကို ပြောင်းရွှေ့ဖို့ စိတ်ဝင်စားနေကြောင်း လန်ဒန်မြို့ အခြေစိုက် သတင်းဌာနတွေက ဆိုပါတယ်။

နာမည်ကြီး သတင်းဌာန တခု ဖြစ်တဲ့ Telegraph သတင်းဌာနရဲ့ ဖော်ပြချက်အရ ချယ်လ်ဆီးအသင်းဟာ ရိုမဲရိုးကို မန်ချက်စတာ ယူနိုက်တက်အသင်းမှာ ရရှိခဲ့တဲ့ လစာအတိုင်း ပေးချေဖို့ စဉ်းစားထားကာ ၂နှစ် သက်တမ်း ရှိတဲ့ စာချုပ်တရပ်နဲ့ ကမ်းလှမ်းတော့မယ်လို့ သိရပါတယ်။