မန်ချက်စတာ ယူနိုက်တက်အသင်းရဲ့ အသင်းခေါင်းဆောင် ကွင်းလယ်ကစားသမား ဘရူနို ဖာနန်ဒက်စ်ကို ဆုဖလားတွေ ရနိုင်တဲ့ အသင်းဆီ ပြောင်းရွှေ့ဖို့ ဘောလုံးသမားဟောင်း ဂျိုး ကိုးလ်က တိုက်တွန်းလိုက်ပြီး အခု သူရနေတာက ဝေဖန်မှုတွေပဲလို့ ပြောကြားခဲ့ပါတယ်။
အသက်(၂၉)နှစ်အရွယ် ပေါ်တူဂီ လက်ရွေးစင် ကွင်းလယ်ဖန်တီးရှင်ဟာ မကြာသေးမီက လက်စတာကို (၃)ဂိုးပြတ်နဲ့ အနိုင်ရရှိခဲ့တဲ့ပွဲမှာ အဓိကကျခဲ့ပြီး ဂိုးဖန်တီးမှု(၂)ကြိမ်နဲ့ သွင်းဂိုး(၁)ဂိုးကို သွင်းယူခဲ့ရင်း ပရီးမီးယားလိဂ်မှာ ဂိုးပေါင်း(၅၀)အထိ ဖန်တီးမှု ပြုလုပ်ထားနိုင်ခဲ့သလို ယူနိုက်တက် ကစားသမားဘဝတစ်လျှောက် ဂိုးပါဝင်ပတ်သက်မှုပေါင်း (၁၁၂)ကြိမ်အထိ စွမ်းဆောင်ထားနိုင်ခဲ့ပါတယ်။
Photo Credit : Goal
၂၀၂၀ ဇန်နဝါရီမှာ စပို့တင်းကနေ ယူနိုက်တက်ဆီ ရောက်ရှိလာကတည်းက ဖာနန်ဒက်စ်ဟာ ပရီးမီးယားလိဂ်ရဲ့ အတည်ငြိမ်ဆုံး ကစားသမားတွေထဲက တစ်ဦး ဖြစ်ခဲ့သလို ပြိုင်ပွဲစုံ (၂၇၆)ပွဲမှာ (၉၇)ဂိုး သွင်းယူကာ (၇၉)ကြိမ် ဂိုးဖန်တီးပေးခဲ့ပါတယ်။ ဒါပေမယ့် သူ့ရဲ့ တစ်ဦးချင်း စွမ်းဆောင်မှုက အထင်ကြီးစရာကောင်းပေမယ့် မန်ယူအသင်းရဲ့ အဓိက ဆုဖလားတွေတွအတွက် စိန်ခေါ်နိုင်စွမ်းမရှိတာကြောင့် ဂျိုး ကိုးလ်က ပေါ်တူဂီသားကို အိုးလ်ထရက်ဖို့ဒ်မှာ သူ့ရဲ့ အနာဂတ်ကို ပြန်လည်စဉ်းစားဖို့ တိုက်တွန်းခဲ့ပါတယ်။
ပက်ဒီပါဝါနဲ့ စကားပြောရာမှာ ဂျိုး ကိုးလ်က “ကျွန်တော်သာ ဘရူနို ဖာနန်ဒက်စ်ဆိုရင် မန်ချက်စတာ ယူနိုက်တက်ကနေ ထွက်ခွာဖို့ သေချာပေါက် စဉ်းစားနေမှာပါ။ သူက အသင်းအတွက် အစွမ်းကုန် ကြိုးစားနေပေမဲ့ လူတိုင်းရဲ့ ဝေဖန်တိုက်ခိုက်မှုတွေကို ခံနေရတယ်။ ဒီအသင်းမှာ သူ့လောက် ကြိုးစားတဲ့သူ မရှိပါဘူး။ ညဘက် အိမ်ပြန်ရောက်ရင်တောင် ဘာကြောင့် ဒီလောက် ဝေဖန်ခံနေရလဲဆိုပြီး တွေးနေရမှာပါ။”
Photo Credit : Caught Offside
“တခြား ကစားသမားတွေလည်း ကောင်းကောင်း ကစားနေတာ ရှိပေမယ့် အသင်းကို ဒီအကျပ်အတည်းကနေ တကယ်ကို ဆွဲထုတ်နေတာ သူတစ်ယောက်ပဲ။ တစ်ချိန်ချိန်မှာ ဘရူနို ယူနိုက်တက်ကနေ ထွက်သွားပြီး အသင်းက ပြန်လည်ကောင်းမွန်လာရင် ဒီကာလကို ပြန်ကြည့်တဲ့အခါ ဘရူနို ဖာနန်ဒက်စ်ဟာ တစ်ခုတည်းသော အလင်းရောင် ဖြစ်နေပါလိမ့်မယ်။ သူဟာ တကယ်ကို ထူးချွန်တဲ့ ဘောလုံးသမားပါ။ သူ့ကို ဘယ်အသင်းမှာမဆို ထားကြည့်လိုက်ပါ။ သူ အောင်မြင်မှာ သေချာပါတယ်။”
“ဒါပေမဲ့ သူဟာ သူ့ဘဝမှာ လိဂ်ဖလားတစ်လုံးမှ မရသေးဘူးလို့ ကျွန်တော်ထင်တယ်။ သူဟာ ထိပ်တန်းအသင်းတစ်သင်းမှာ ကစားနိုင်တယ်ဆိုတာ သူ့ကိုယ်သူ သက်သေပြဖို့ လိုအပ်တယ်။ အခုတော့ သူ မန်ချက်စတာ ယူနိုက်တက်မှာ သူ အစွမ်းကုန် ကြိုးစားခဲ့ပြီးပြီ။ သူဟာ အားလုံးရဲ့ ချီးကျူးထောပနာနဲ့အတူ အသင်းကနေ ထွက်ခွာသင့်တယ်။ ပိုင်ရှင်တွေ၊ ပရိသတ်တွေနဲ့ နည်းပြတွေက သူ့ကို ဂုဏ်ပြုပေးသင့်တယ်။ ဘာလို့လဲဆိုတော့ သူဟာ အပြစ်တင်ဝေဖန်မှုတွေ အားလုံးကို ခံနေရလို့ပါ။ ဒါဟာ မန်ချက်စတာ ယူနိုက်တက် ဘောလုံးသမားတစ်ယောက်ဖြစ်ခြင်းရဲ့ အစိတ်အပိုင်းတစ်ရပ်ပါ။ ဒါပေမဲ့ ဂိုးတွေသွင်း၊ ဂိုးတွေဖန်တီးပြီး အသင်းကို ရှေ့ကို တွန်းပို့နေတဲ့သူက ဝေဖန်မှုတွေခံနေရတဲ့အခါ သူ ဘယ်လိုခံစားရမလဲ။ သူဟာ တကယ်ကို ထူးချွန်တဲ့ ကစားသမားပါ။ ကျွန်တော်သာ သူဆိုရင် ဆုဖလားတွေ ရယူနိုင်တဲ့ အသင်းမှာ သွားကစားဖို့ ရှာဖွေနေမှာပါ။” လို့ မှတ်ချက်ပြု ပြောဆိုသွားခဲ့ပါတယ်။
