ဘိုင်ယန်မြူးနစ်ကတော့ သူတို့ရဲ့ အဓိက ပစ်မှတ် ဟယ်ရီကိန်းကို မခေါ်ယူနိုင်တော့ဘူးဆိုရင် ဂျုဗင်တပ်စ်က ဆားဘီးယား တိုက်စစ်မှူး ဒူဆန် ဗလာဟိုဗစ်ကိုသာ ပြောင်းလဲ ကြိုးပမ်းသွားဖွယ် ရှိနေတယ်လို့ Mail Sports ကနေ ဖော်ပြလာခဲ့ပါတယ်။
ဘိုင်ယန် နည်းပြ သောမတ်စ် တူဟယ်လ်က အသင်းတိုက်စစ်ပိုင်းအတွက် တော့တင်ဟမ် ဟော့စပါး တိုက်စစ်မှူး ဟယ်ရီကိန်းကို main target အဖြစ် သတ်မှတ်ထားပြီး ကမ်းလှမ်းမှုတွေ အကြိမ်ကြိမ် ကမ်းလှမ်းထားပေမယ့်လည်း အခုအချိန်အထိ စပါးဘက်က မီးစိမ်းမပြသေးပဲ ရှိနေပါတယ်။
Photo Credit : Football365
ဘိုင်ယန်က ဟယ်ရီကိန်းအတွက် နောက်ဆုံးသော ကမ်းလှမ်းမှုတစ်ရပ်ကိုလည်း ဒီရက်ပိုင်းထဲမှာပဲ လုပ်ဆောင်ထားပြီး ဒီကမ်းလှမ်းမှုကို စပါးဘက်ကနေ ညတွင်းချင်း အကြောင်းပြန်ပေးဖို့ တောင်းဆိုထားခဲ့ရာ ဒါကို စပါး ဥက္ကဌ ဒန်နရီယ် လီဗီးက လစ်လျူရှုထားခဲ့ကာ မိသားစုနဲ့ အမေရိကန်ကို ခရီးထွက်နေပါတယ်။
ဒီလို အခြေအနေတွေကြောင့် ဘိုင်ယန်က ကိန်းကို အရမ်း လိုချင်ပေမယ့်လည်း စပါးအသင်းရဲ့ ပြုမှုပုံတွေကို လက်ခံနိုင်စရာ မရှိတာကြောင့် သူတို့ရဲ့ target ကို အချိန်မီ ပြောင်းလဲလိုက်ဖို့ပါ ပြင်ဆင်လာပါတော့တယ်။ လောလောဆယ်မှာတော့ ဘိုင်ယန်က အရောင်းစာရင်းထဲ ရောက်နေတဲ့ ဗလာဟိုဗစ်ကို ပြောင်းလဲ ချိန်ရွယ်ဖွယ် ရှိနေပါတယ်။
Photo Credit : Bavarian Football Works
ဗလာဟိုဗစ်က ဂျုဗင်တပ်စ်အသင်းရဲ့ အဓိက တိုက်စစ်မှူးတစ်ဦး ဖြစ်ပေမယ့် နည်းပြ အယ်လီဂရီ လက်ထက်မှာ ခြေစွမ်းပိုင်း အနည်းငယ် မြှပ်နေရသလို အယ်လီဂရီကလည်း ဗလာဟိုဗစ်ကို သိပ် သဘောမတွေ့တာကျကြောင့် ဒီနွေဈေးကွက်မှာပဲ အသင်းကနေ ပြန်လည် ရောင်းချဖို့ ပြင်ဆင်နေပါတယ်။
လတ်တလောမှာတော့ ဗလာဟိုဗစ်ကို ချယ်လ်ဆီးအသင်းက စိတ်ဝင်စားနေပြီး ရီးယဲလ် မက်ဒရစ်နဲ့လည်း သတင်းထွက်ပေါ်လျက် ရှိနေပေမယ့် ကိန်းကို ခေါ်ယူဖို့ အခြေအနေ သိပ်မကောင်းတော့တဲ့ ဘိုင်ယန်ကလည်း ဗလာဟိုဗစ် race ထဲ ရုတ်တရက် ဝင်ရောက်လာဖွယ် ရှိနိုင်ပြီး ကိန်းရဲ့ ကမ်းလှမ်းရတဲ့ တန်ကြေးထက်လည်း သက်သာနိုင်တာကြောင့် ဗလာဟိုဗစ်ကိုသာ ထဲထဲဝင်ဝင် ကြိုးပမ်းလာဖို့ ရှိနိုင်ပါတယ်။
