အာဆင်နယ်အသင်းရဲ့ နည်းပြ မီခယ်လ် အာတီတာ က တောင်ပံကစားသမား ဘူကာယို ဆာကာ ဒဏ်ရာကနေ ပြန်လည်ပါဝင်လာပြီး အသင်းအတွက် ဂိုးသွင်းနိုင်ခဲ့တာကို လှပတဲ့အခိုက်အတန့်” လို ချီးကျူးလိုက်ပါတယ်။ ဆာကာဟာ ပြီးခဲ့တဲ့ညက ဖူလ်ဟမ်အသင်းကို အနိုင်ရခဲ့တဲ့ပွဲမှာ ပွဲစပြီး ၇ မိနစ်မှာတင် ဂိုးသွင်းယူနိုင်ခဲ့တာပါ။
(၂၃)နှစ်အရွယ် ဆာကာဟာ ပေါင်ခြံဒဏ်ရာကြောင့် ခွဲစိတ်ကုသမှု ခံယူခဲ့ရပြီး ရက်ပေါင်း (၁၀၁)ရက်ကြာ အနားယူခဲ့ရပါတယ်။ ဒီပွဲမှာ ဆာကာဟာ (၆၆)မိနစ်မှာ လူစားဝင်ကစားခဲ့ပြီး ခဏအကြာမှာတင် ဂိုးတစ်လုံးထပ်သွင်းနိုင်ခဲ့ပါတယ်။ ဒီဂိုးက ပထမပိုင်းမှာ မိုက်ကယ် မယ်ရီနိုသွင်းထားတဲ့ ဂိုးကို ထပ်မံအားဖြည့်ပေးခဲ့တာပါ။
Photo Credit : Optus Sports
ဆာကာရဲ့ ဂိုးက ဂါဘရီယယ် မာတီနယ်လီ ဖြတ်တင်ပေးတဲ့ ဘောလုံးကို ခေါင်းတိုက်သွင်းယူခဲ့တာဖြစ်ပြီး ဂိုးသွင်းယူပြီးတဲ့အခါ အာဆင်နယ်အသင်းရဲ့ ဆေးအဖွဲနဲ့ အားကစားသိပ္ပံပညာရှင်တွေဆီ ပြေးသွားပြီး အောင်ပွဲခံခဲ့ပါတယ်။
အာတီတာက “ဒါက တကယ့်ကို လှပတဲ့အချိန်ပဲ။ ကျွန်တော်တိုရဲ့လူတွေက ဆာကာကို ဘယ်လောက်ချစ်ခင် လေးစား သဘောကျတယ်ဆိုတာ ဒီမှာ မြင်ရတယ်။ သူ့ရဲ့တုံပြန်မှုက အကောင်းဆုံးသက်သေပါပဲ။ ဂိုးသွင်းပြီးတာနဲ့ သူဘာလုပ်လဲ။ သူပြေးသွားပြီး သူ့ကို ဒီလိုအခြေအနေပြန်ရောက်အောင် ကူညီပေးခဲ့တဲ့ အားကစားသိပ္ပံပညာရှင်တွေ ဆေးအဖွဲတွေကို ကျေးဇူးတင်စကားပြောတယ်။”
Photo Credit : Football Addict
“သူက ကွင်းထဲမှာ စွမ်းအင်တွေကို မြှင့်တင်ပေးခဲ့တယ်။ သူပြန်လာတာ တကယ်ကို ဝမ်းသာစရာပဲ” လို ပြောပါတယ်။ ဒါပေမယ့် အာဆင်နယ်အတွက် ဒီပွဲက သိပ်ပြီး ပြီးပြည့်စုံမနေခဲ့ပါဘူး။ ဆာကာပြန်လာပေမယ့် ခံစစ်မှာ အဓိကကစားသမား ဂါဘရီယယ်ကို ပွဲစပြီး (၁၆)မိနစ်မှာတင် ပေါင်ခြံဒဏ်ရာနဲ့ လူစားလဲခဲ့ရပါတယ်။ ဒါဟာ လာမယ့် အင်္ဂါနေ့မှာ ရီးယဲလ်မက်ဒရစ်နဲ့ ချန်ပီယံလိဂ် ကွာတားဖိုင်နယ် ပထမအကျော့ပွဲမတိုင်ခင် ကြီးမားတဲ့ ထိုးနှက်ချက်တစ်ခုပါ။ ဂါဘရီယယ်နဲ့ ဒူးဒဏ်ရာရှိနေတဲ့ ဂျူရီယန် တင်ဘာတိုကို ဒီနေ့မှာ စစ်ဆေးမှုတွေ ပြုလုပ်သွားမှာဖြစ်ပါတယ်။
အာတီတာက “ဟုတ်တယ်၊ စိုးရိမ်စရာရှိတယ်။ ဘာလို့ဆို ဂါဘရီယယ်က ဘယ်တော့မှ ကွင်းထဲက ထွက်သွားတာမျိုး မရှိဘူး။ သူ တစ်ခုခုခံစားမိတယ်လို့ ပြောတယ်။ ဒဏ်ရာဘယ်လောက်ဆိုးလဲဆိုတာ မသိသေးဘူး။ တင်ဘာလည်း ပွဲအစောပိုင်းမှာ အခက်အခဲရှိနေခဲ့တယ်။ ဆက်ကစားနိုင်ခဲ့ပေမယ့် တစ်ချိန်ချိန်မှာ မထိန်းနိုင်တော့ဘူး။ သူတိုနှစ်ယောက်ရဲ့ အခြေအနေကို မသိသေးဘူး။ ဒီနေ့မှာ စစ်ဆေးပြီး ဘယ်လိုဖြစ်မလဲဆိုတာ ပိုရှင်းလာမှာပါ” လို ဆိုပါတယ်။
