လက်ရှိမှာ အာဆင်နယ်အသင်းက ပရီးမီးယားလိဂ် အမှတ်ပေးဇယားမှာ အဆင့်(၂)နေရာမှာ ရပ်တည်နေပြီး ဇယားထိပ်က လီဗာပူးလ်ထက် (၁)ပွဲလျော့ (၁၁)ပွဲမှတ်ကွာ အနေအထားထိတောင် ရောက်နေပေမယ့် အာဆင်နယ်နည်းပြ မီခယ်လ် အာတာတီက သူတို့ဟာ ချန်ပီယံဆုအတွက် စိန်ခေါ်နိုင်သေးတယ်လို့ ခိုင်ခိုင်မာမာ ယုံကြည်နေပါတယ်။
ဒီတစ်ပတ်မှာ အာဆင်နယ်က ဝက်စ်ဟမ်းနဲ့ ကစားရတဲ့ လန်ဒန်ဒါဘီ ပွဲစဉ်ထဲ မထင်မှတ်ဘဲ ရှုံးပွဲတွေ့ခဲ့သလို လီဗာပူးလ်ကပါ မန်စီးတီးကို အီတီဟတ်ကွင်းမှာ အနိုင်ယူလိုက်တာကြောင့် လီဗာပူးလ်နဲ့ အာဆင်နယ်တို့ကြားမှာ အမှတ်ကွာဟချက်ဟာ (၁၁)မှတ်အထိတောင် ရှိသွားခဲ့ရတာ ဖြစ်ပါတယ်။
Photo Credit : Eurosport
ဒီအခြေအနေကြောင့် အာဆင်နယ်က လီဗာပူးလ်ကို ကျော်ဖြတ်ပြီး ပရီးမီးယားလိဂ် ချန်ပီယံ ဖြစ်လာနိုင်ဖို့ မဖြစ်နိုင်တော့ဘူး မလွယ်ကူတော့ဘူးလို့ သုံးသပ်မှုတွေ ရှိနေပေမယ့်လည်း နည်းပြအာတီတာကတော့ သူ့အသင်းက အမှတ်ပေး ချန်ပီယံဆုအတွက် စိန်ခေါ်နိုင်သေးတယ်လို့ ယုံကြည်ကြောင်း ပြောဆိုလိုက်ပါတယ်။
“ကျွန်တော့် အသက်မရှိရင်တောင်” လို့ အာတီတာက သတင်းထောက်တွေကို ပြောကြားခဲ့ပါတယ်။ “မဟုတ်ရင် ကျွန်တော် အိမ်ပြန်မှာပါ။ သင်္ချာနည်းအရ ဖြစ်နိုင်ပါတယ်။ သင် အဲဒီမှာ ရှိနေတယ်ဆိုရင် ပွဲတိုင်း ကစားရပါမယ်။ လွန်ခဲ့တဲ့ သုံးရက်က ကျွန်တော်တို့ အမှတ်ကွာဟမှုကို တစ်ပွဲခွဲစာလောက် လျော့ချနိုင်မယ်လို့ ပြောနိုင်ပါတယ်။ ဒါက အရေးမကြီးပါဘူး။ ကျွန်တော်တို့ ဆက်လက်သွားရပါမယ်။
Photo Credit : The Independent
“အခက်အခဲက သုံးရက်ကထက် ပိုမြင့်ပါတယ်။ ဒါပေမယ့် ပရီးမီးယားလိဂ်ဖလားကို ရယူချင်တယ်ဆိုရင် ထူးခြားတဲ့ အရာတစ်ခုကို လုပ်ရပါမယ်။ ကျွန်တော်တို့မှာ ရှိတဲ့ အခြေအနေတွေနဲ့ ပရီးမီးယားလိဂ်ကို ဆွတ်ခူးချင်တယ်ဆိုရင် ပရီးမီးယားလိဂ် သမိုင်းမှာ ဘယ်အသင်းကမှ မလုပ်ဖူးတဲ့ အရာတစ်ခုကို လုပ်ရပါလိမ့်မယ်။” လို့ ပြောခဲ့ပါတယ်။
အာဆင်နယ်က မနက်ဖြန်မှာ နော်တင်ဟမ် ဖောရက်စ်အသင်းနဲ့ အဝေးကွင်းမှာ သွားရောက် ရင်ဆိုင်ရဦးမှာဖြစ်ပြီး လီဗာပူးလ်ကတော့ အန်ဖီးလ်မှာ နယူးကာဆယ်ကို ဧည့်ခံရမှာဖြစ်ပြီး တကယ်လို့ နော်တင်ဟမ်နဲ့ ပွဲမှာပါ ထပ်မံ ခြေချော်သွားမယ်ဆိုရင်တော့ အာဆင်နယ်ရဲ့ ချန်ပီယံ မျှော်လင့်ချက်က လုံးဝ အဆုံးသတ်သွားနိုင်ပါတယ်။
