အာဆင်နယ်အသင်းကတော့ ရီးယဲလ် မက်ဒရစ်အသင်းရဲ့ တူရကီ ကြယ်ပွင့်ကစားသမားလေး အာဒါ ဂူလာကို လာမယ့် ဇန်နဝါရီ ဆောင်းရာသီ အပြောင်းအရွှေ့ဈေးကွက်အတွင်းမှာပဲ ရာသီကုန်အထိ အငှားခေါ်ယူမှုနဲ့ ကမ်းလှမ်းသွားဖို့ ကြိုးပမ်းသွားဖွယ် ရှိနေတယ်လို့ သတင်းထွက်ပေါ်လာခဲ့ပါတယ်။
အာဆင်နယ်ဟာ ရီးယဲလ် ကစားသမားတွေဖြစ်တဲ့ အိုဇေး အိုဒီဂတ် စီဘယ်ယို့စ်တို့ကိုလည်း ခေါ်ယူခဲ့ပြီး ဒီထဲကမှ နော်ဝေ ကွင်းလယ်ကစားသမား မာတင် အိုဒီဂတ်ကို အငှားကနေ အပြီးသတ် ခေါ်ယူနိုင်ခဲ့ရာ အခုဆိုရင် အိုဒီဂတ်က အာဆင်နယ်အတွက် အရေးအပါဆုံး ကစားသမားတစ်ဦးပါ ဖြစ်လာခဲ့ရပါတယ်။
Photo Credit : Football365
အိုဒီဂတ်က အာဆင်နယ်ရဲ့ အသင်းခေါင်းဆောင်တစ်ဦး အဓိက ကစားသမားတစ်ဦး ဖြစ်လာချိန်မှာ အာဆင်နယ်က အိုဒီဂတ် အပြောင်းအရွှေ့အတိုင်း နောက်ထပ် ရီးယဲလ် ကစားသမားတစ်ဦးဖြစ်တဲ့ ဂူလာကို ထပ်မံ ချဉ်းကပ်လာခဲ့ပြန်ပါတယ်။ အာဆင်နယ်က တူရကီ ကွင်းလယ်ကစားသမားလေး ဂူလာကို ရီးယဲလ်ကနေ ကာလတို အငှားစာချုပ်နဲ့ ခေါ်ယူသွားချင်နေပါတယ်။
အသက် (၁၉)နှစ်အရွယ်သာ ရှိသေးတဲ့ ဆယ်ကျော်သက် ကစားသမားလေး ဂူလာဟာ ကွင်းလယ်တိုက်စစ်နဲ့ တောင်ပံနေရာတွေမှာ ကစားတာဖြစ်ပြီး ၂၀၂၃ နွေကမှ တူရကီ ထိပ်သီးကလပ် ဖီနာဘာချီကနေ ရီးယဲလ်အသင်းဆီ (၆)နှစ်စာချုပ်တစ်ရပ်နဲ့ ပြောင်းရွှေ့လာခဲ့တာ ဖြစ်ပါတယ်။
Photo Credit : French Football Weekly
ပြီးခဲ့တဲ့ တစ်ရာသီလုံး ပြိုင်ပွဲစုံ (၁၂)ပွဲသာ ကစားထားရတဲ့ ဂူလာဟာ ဒီရာသီမှာလည်း လက်ရှိအချိန်ထိ (၁၂)ပွဲ ကစားထားရပေမယ့် (၁၂)ပွဲမှာ (၃)ပွဲသာ ပွဲထွက်ကစားသမားအဖြစ် ကစားထားရတဲ့အပေါ် အနည်းငယ် စိတ်ပျက်နေရသလို ဒီအခြေအနေကိုလည်း ဥရောပထိပ်သီး ကလပ်အသင်းတွေက စောင့်ကြည့်လျက် ရှိနေကြပါတယ်။
ဒီလို ပွဲကစားခွင့် နည်းပါးနေတဲ့ ဂူလာကို အာဆင်နယ်အသင်းက ရာသီကုန်အထိ အငှားနဲ့ ခေါ်ယူချင်လာခဲ့ပြီး အာဆင်နယ်ဆိုတာကလည်း ဂူလာ နှစ်သက်အားကျရတဲ့ အိုဇေးရဲ့ အသင်းဟောင်းလည်း ဖြစ်နေတာကြောင့် ကမ်းလှမ်းမှုသာ တကယ်ဖြစ်လာခဲ့ရင် လက်ခံလာနိုင်မလားဆိုတာ စိတ်ဝင်စားစရာ ဖြစ်နေရပါတယ်။ ဒါပေမယ့် ရီးယဲလ် နည်းပြကြီး အန်ဆယ်လော့တီကတော့ ဂူလာကို အသင်းမှာပဲ ဆက်ထားပြီး ကစားခွင့်တွေ ပေးသွားဖွယ်လည်း ရှိနေပါတယ်။
