မန်ချက်စတာ ယူနိုက်တက်အသင်းရဲ့ နည်းပြဖြစ်သူ ရူဘင် အမော်ရင်က ဒီနေ့ည နော်တင်ဟမ် ဖောရက်စ်အသင်းနဲ့ ရင်ဆိုင်သွားရမယ့် ပွဲစဉ်ကနေ စတင်ပြီး ဒီရာသီ လက်ကျန် ပရီးမီးယားလိဂ်ပွဲတွေကို အားကောင်းစွာ ဖြတ်သန်းသွားနိုင်လိမ့်မယ်လို့ ယုံကြည်ထားကြောင်း အခိုင်အမာ ပြောကြားလိုက်ပါတယ်။
အမော်ရင်ရဲ့ ယူနိုက်တက်အသင်းဟာ နိုင်ငံတကာ ရက်သတ္တပတ် မစတင်ခင်မှာပဲ ပြိုင်ပွဲစုံ (၄)ပွဲဆက်တိုက် ရှုံးပွဲမရှိအောင် ကစားထားနိုင်ခဲ့သလို နောက်ဆုံး(၂)ပွဲမှာလည်း ဆိုစီဒက်နဲ့ လက်စတာတို့ကို အနိုင်ယူထားခဲ့ပါတယ်။ အခုလည်း နော်တင်ဟမ်ကိုသာ အနိုင်ရမယ်ဆိုရင် ပရီးမီးယားလိဂ်မှာ အဆင့်ရပ်တည်ချက် မြှင့်တက်လာဖို့ ရှိနေပါတယ်။
Photo Credit : Opta Analyst
လက်ရှိမှာ ယူနိုက်တက်က ပရီးမီးယားလိဂ် အမှတ်ပေးဇယားမှာ အဆင့်(၁၃)နေရာနဲ့ ရပ်တည်နေရတာဖြစ်ပြီး လက်ကျန်ပွဲက (၉)ပွဲအထိ ကစားဖို့ ကျန်နေသေးသလို အဲ့ဒီ (၉)ပွဲမှာ နော်တင်ဟမ် မန်စီးတီး နယူးကာဆယ် ဝုလ်ဗ် ဘုန်းမောက် ဘရန့်ဖို့ဒ် ဝက်စ်ဟမ်း ချယ်လ်ဆီး ဗီလာတို့နဲ့ ကစားရမှာဖြစ်လို့ ယူနိုက်တက်အတွက်တော့ စိန်ခေါ်မှုတွေက ကြီးမားနေနိုင်ပါတယ်။
ဒါပေမယ့် လက်ရှိမှာ ဒဏ်ရာရ ကစားသမားတွေက ပြန်လည် သက်သာလာပြီ ဖြစ်သလို ဗဟိုခံစစ်ကစားသမားတွေဖြစ်တဲ့ ဟယ်ရီ မက်ဂွိုင်းယားနဲ့ လန်နီ ယိုရိုတို့ ဒဏ်ရာကနေ ပြန်လာနိုင်ပြီလို့ အမော်ရင်ကိုယ်တိုင် အတည်ပြုလိုက်ပါတယ်။ ဒါ့အပြင် အမော်ရင်က “ကျွန်တော် အရမ်းယုံကြည်မှု ရှိတယ်လို့ ပြောလို့ရပါတယ်။”
Photo Credit : The Straits Times
“ကစားသမားတွေမှာ ယုံကြည်မှု ပိုတိုးလာတာ ခံစားရတယ်။ အသင်းရဲ့ စွမ်းအင်ကလည်း အရင်နဲ့ မတူတော့ဘူး။ ဒါပေမယ့် ဒီအရာတွေက ရလဒ်တွေပေါ် မူတည်ပြီး ပြောင်းသွားနိုင်တယ်ဆိုတာကိုလည်း ကျွန်တော် သဘောပေါက်ပါတယ်။ ဒီစွမ်းအင်ကို ဆက်ထိန်းထားဖို့ ကျွန်တော်တို့ အာရုံစူးစိုက်နေတယ်။”
“ပွဲတွေ အနိုင်ရရင်တောင် တိုးတက်စရာတွေ အများကြီး ရှိသေးတယ်ဆိုတာ ကျွန်တော်တို့ ဝန်ခံပါတယ်။ ဒါပေမယ့် အခုက အရင်နဲ့ မတူတဲ့ အချိန်ပါ။ ယုံကြည်မှု ပိုရှိလာတယ်၊။ ရာသီရဲ့ နောက်ဆုံး (၂)လကို ရင်ဆိုင်ဖို့ အဆင်သင့်ဖြစ်နေပါပြီ။ ဘယ်နေရာမှာ ပြီးဆုံးမလဲ မသိပေမယ့် ကျွန်တော်တို့ အပေါ်ကို တက်လှမ်းဖို့ မျှော်လင့်ထားတယ်။ ပွဲတိုင်းကို အနိုင်ရဖို့ ရည်ရွယ်ထားတယ်။” လို့ ထုတ်ဖော် ပြောဆိုသွားခဲ့ပါတယ်။
