အယ်လ်နာဆာအသင်းခေါင်းဆောင် တိုက်စစ်ကစားသမားကြီး ခရစ္စတီယာနို ရော်နယ်ဒိုက အယ်လ်ဟီလာအသင်းနဲ့ ရင်ဆိုင်ခဲ့ရတဲ့ ဒါဘီပွဲစဉ် ဂိုး(၂)ဂိုး သွင်းယူပြီး နိုင်ပွဲရအောင် စွမ်းဆောင်ပေးခဲ့ပေမယ့် သူ့ရဲ့ ကစားသမားဘဝမှာ ဂိုး(၁၀၀၀) ပြည့်မြောက်ဖို့ ရည်မှန်းချက်နဲ့ ပတ်သက်ပြီး မထင်မှတ်ထားတဲ့ ဝန်ခံစကား ပြောလိုက်ပါတယ်။
အသက်(၄၀)အရွယ် ရှိနေပေမယ့် အောင်မြင်မှုတွေ ဆက်လက်ရှာဖွေနေတဲ့ အယ်လ်နာဆာရဲ့ စူပါစတားကြီး ရော်နယ်လ်ဒိုဟာ မနေ့ညက ခါးသီး ဒပြိုင်ဘက် အယ်လ်ဟီလာကို အနိုင်ရတဲ့ပွဲမှာ ဒီပွဲရဲ့ အဓိက ဇာတ်ဆောင်ဖြစ်ခဲ့ပါတယ်။ ဒီအနိုင်ရမှုက အယ်လ်နာဆာကို အမှတ်ပေးဇယား ဒုတိယနေရာမှာရှိတဲ့ အယ်လ်ဟီလာနဲ့ (၃)မှတ်အကွာအထိ နီးကပ်လာစေခဲ့တယ်။
Photo Credit : Goal
ရော်နယ်လ်ဒိုက ပွဲချိန်(၄၇)မိနစ်မှာ အသင်းအတွက် ဒုတိယမြောက်ဂိုးနဲ့ (၈၈)မိနစ်မှာ ပင်နယ်တီကနေတစ်ဆင့် ဂိုးတွေ သွင်းယူပြီး အသင်း နိုင်ပွဲရအောင် စွမ်းဆောင်ပေးခဲ့ပေမယ့်လည်း ပွဲအပြီးမှာ သူပြောတဲ့ စကားက လူတွေကို အံ့အားသင့်စေခဲ့ပါတယ်။
ဒီအရေးကြီးတဲ့ နိုင်ပွဲအပြီးမှာ ရော်နယ်လ်ဒိုက “ညီကိုတို့ရေ အခုချိန်ကို အရင်ပျော်ကြရအောင်။ ကျွန်တော် ဂိုး(၁၀၀၀)နောက်ကို လိုက်နေတာ မဟုတ်ပါဘူး။ ဖြစ်သွားရင် ကောင်းတာပေါ့၊ မဖြစ်လာရင်လည်း ဘာမှမဖြစ်ပါဘူး။ အရေးကြီးဆုံးကတော့ အခုလက်ရှိအချိန်လေးပါပဲ။ နောင်ဘာဖြစ်လာမယ်ဆိုတာထက် ဒီအချိန်လေးကို ခံစားပါ။”
Photo Credit : Goal
“ဒီနိုင်ပွဲက အရမ်းကောင်းတယ်။ ကျွန်တော် ဂိုးသွင်းလို့ မဟုတ်ဘူးနော်။ အယ်လ်ဟီလာကို ဂိုး(၂)ဂိုး သွင်းရတာ ပျော်ပေမယ့် ဒါဘီပွဲကို အနိုင်ရတာက အရေးအကြီးဆုံးပါ။ အဝေးကွင်းမှာ ကစားရတာ အမြဲခက်ခဲပြီး ပြိုင်ဘက်ကလည်း အရမ်းကောင်းတဲ့အသင်းပါ။ ဒီအောင်ပွဲကို တန်ဖိုးထားရမယ်။ လိဂ်မှာ (၉)ပွဲ ချန်ပီယံလိဂ်မှာ (၁)ပွဲ ကျန်သေးတယ်။ အရာအားလုံး ဖြစ်နိုင်သေးတယ်။ ဆက်ကြိုးစားပြီး ယုံကြည်ထားရမယ်။” လို့ ပြောဆိုခဲ့ပါတယ်။
ဒီ ဂိုး(၁၀၀၀)မှတ်တိုင်နဲ့ ပတ်သက်ပြီး ရော်နယ်ဒိုက အရင်ကလည်း ပြောဖူးပါတယ်။ “ကျွန်တော် ဂိုး(၉၀၀) ပြည့်ခဲ့ပြီးပါပြီ။ အခုတော့ သူတို့က ဂိုး(၁၀၀၀)ကို လိုချင်နေကြပါပြီ။ ဒါဟာ တဖြည်းဖြည်းနဲ့ တာဝန်တစ်ခုလို ဖြစ်လာနေပါတယ်။ ဒါကြောင့် ကျွန်တော်ပြောတာပါ။ လက်ရှိအချိန်လေးမှာပဲ အာရုံစိုက်ပြီး နေထိုင်ပါ။ နောက်နှစ်တွေမှာ ကျွန်တော့်ရဲ့ခြေထောက်တွေက ဘယ်လိုတုံ့ပြန်မလဲဆိုတာကို စောင့်ကြည့်ရမှာပါ။”လို့ ပြောခဲ့ပါတယ်။ လက်ရှိမှာတော့ ရော်နယ်လ်ဒိုဟာ ဂိုး(၁၀၀၀) ပြည့်ဖို့အတွက် (၆၉)ဂိုးပဲ ကျန်နေပါတော့တယ်။
