မန်ချက်စတာ ယူနိုက်တက်အသင်းရဲ့ အသင်းခေါင်းဆောင် ပေါ်တူဂီ ကွင်းလယ်ကစားသမား ဘရူနို ဖာနန်ဒက်စ်ဟာ သူ့ရဲ့ အကောင်းဆုံးအချိန်တွေကို ယူနိုက်တက်အသင်းမှာ အလဟဿ ဖြစ်စေခဲ့တယ်လို အက်စတန် ဗီလာအသင်း ကစားသမားဟောင်း ဂါဘီ အဘွန်လဟောက talkSPORT အစီအစဉ်မှာ ပြောခဲ့ပါတယ်။
မကြာခင်မှာ အသက်(၃၁)နှစ်ပြည့်တော့မယ့် ဖာနန်ဒက်စ်ဟာ ၂၀၂၀ ဇန်နဝါရီလကမှ စပို့တင်း လစ္စဘွန်းကနေ ယူနိုက်တက်ဆီ ပြောင်းရွှေ့လာခဲ့တာဖြစ်ပြီး အခုဆိုရင် ယူနိုက်တက်မှာ (၅)နှစ်အထိ ပါဝင်ကစားထားခဲ့ရပြီ ဖြစ်ပေမယ့်လည်း အသင်းနဲ့အတူ အက်ဖ်အေဖလားနဲ့ လိဂ်ဖလားတို့သာ ရယူထားနိုင်ခဲ့ပါတယ်။
Photo Credit : Goal
အသင်းဆီ ရောက်လာကတည်းကနေ အခုချိန်အထိ ယူနိုက်တက်အတွက် အရေးပါတဲ့ ကစားသမားတစ်ဦးအပြင် အသင်းခေါင်းဆောင်ပါ ဖြစ်လာခဲ့တဲ့ ဖာနန်ဒက်စ်ဟာ အသင်းအတွက် ပြိုင်ပွဲစုံပွဲပေါင်း (၂၇၈)ပွဲ ကစားထားခဲ့ပြီး (၉၅)ဂိုး သွင်းယူပေးထားသလို (၈၂)ဂိုးအထိ ဂိုးဖန်တီးထားနိုင်ခဲ့ကာ ပြီးခဲ့တဲ့နှစ်ကပဲ အသင်းနဲ့ စာချုပ်သက်တမ်းပါ တိုးမြှင့်ထားပါတယ်။
အရည်အသွေးမြင့် ကစားသမားတစ်ဦးဖြစ်တဲ့ ဖာနန်ဒက်စ်ဟာ လတ်တလောမှာ ရီးယဲလ် မက်ဒရစ်အသင်းနဲ့လည်း အပြောင်းအရွှေ့သတင်းတွေ ထွက်ပေါ်လျက် ရှိလို့နေပြီး ဒီကစားသမားရဲ့ အခြေအနေနဲ့ ပတ်သက်လို့ အဘွန်လဟောက သူရဲ့ထင်မြင်ချက်တွေကို ဖော်ပြလာခဲ့ပါတယ်။
Photo Credit : The New York Times
“သူ့အသက်က လာမယ့် စက်တင်ဘာလမှာ (၃၁)နှစ် ပြည့်တော့မယ်။ တကယ်လို့ သူ နောက်ရာသီမှာ ဘာဆုမှမရပဲ အနားယူလိုက်တယ် ဒါမှမဟုတ် ယူနိုက်တက်ကနေ ထွက်သွားတယ်ဆိုရင် သူ့မှာ အက်ဖ်အေဖလားတစ်လုံးနဲ့ ကာရာဘောင်းဖလားတစ်လုံးပဲ ရှိမှာ။ ကျွန်တော်ကတော့ သူ့ရဲ့ အကောင်းဆုံးနှစ်တွေကို ဒီအသင်းမှာပဲ အလဟဿ ဖြစ်ခဲ့တယ်လို ထင်တယ်။ ယူရိုပါလိဂ်ဖလား ရခဲ့ရင်တောင် အတူတူပါပဲ။” လို့ အဘွန်လဟောက ပြောခဲ့ပါတယ်။
ဖာနန်ဒက်စ်ရဲ့ ယူနိုက်တက်အသင်းဟာ ဒီတစ်ပတ်မှာတော့ မန်စီးတီးအသင်းနဲ့ မန်ချက်စတာဒါဘီ ပွဲကျပ်ကို ရင်ဆိုင်ရမှာဖြစ်ပြီး အဲ့ဒီပွဲပြီးရင်တော့ ယူရိုပါလိဂ် ကွာတားဖိုင်နယ် ပထမအကျော့အဖြစ် လိုင်ယွန်အသင်းနဲ့ ကစားရပါမယ်။ နည်းပြ ရူဘင် အမော်ရင်ကတော့ ဒီရာသီကို ဆုဖလားတစ်လုံးနဲ့ အဆုံးသတ်နိုင်ဖို့ ကြိုးစားနေဆဲ ဖြစ်ပါတယ်။
