မန်ချက်စတာ ယူနိုက်တက်အသင်းရဲ့ မေ့လျော့ခံထားရတဲ့ ကြယ်ပွင့်ဟောင်း ဘရန်ဒန် ဝီလျံစ်က သူ့ရဲ့ အနာဂတ်နဲ့ အန္တရာယ်ရှိတဲ့ ကားမောင်းမှုကြောင့် ထောင်ဒဏ် (၂)နှစ်အထိ ရင်ဆိုင်ရနိုင်တဲ့ အခြေအနေတွေ အကြောင်းကို ရင်ဖွင့် ပြောကြားခဲ့ပါတယ်။
ယူနိုက်တက်ရဲ့ နောက်တန်းကစားသမားဟောင်း ဘရန်ဒန် ဝီလျံစ်ဟာ အသင်းကနေ ထွက်ခွာခဲ့ရပြီးနောက် သူ့ဘဝအကြောင်း ပွင့်ပွင့်လင်းလင်း ပြောပြလာခဲ့ပါတယ်။ ဝီလျံစ်ဟာ ယူနိုက်တက် လူငယ်အကယ်ဒမီကနေ ထွက်ပေါ်လာခဲ့သူဖြစ်ပြီး ၂၀၁၉ မှာ အသင်းကြီးအတွက် ပွဲထွက်ကစားခွင့်ရခဲ့ပါတယ်။ အဲဒီနောက် အိုးလ်ထရက်ဖို့ဒ်မှာ (၂)နှစ်ကြာ ကစားခဲ့ပြီး ပရီးမီးယားလိဂ်မှာ (၂၁)ပွဲထိ ပါဝင်ခဲ့ပါတယ်။
Photo Credit : Goal
ဒါပေမယ့် ၂၀၂၁ မှာ နော်ဝစ်ချ်စီးတီးကို အငှားနဲ့ ထွက်သွားခဲ့ရသလို ၂၀၂၃-၂၄ ရာသီမှာလည်း အစ်ဝစ်ချ်တောင်းကို ထပ်မံအငှားနဲ့ သွားကစားခဲ့ပါတယ်။ ဒါပေမယ့် ပြီးခဲ့တဲ့ နွေရာသီမှာ ယူနိုက်တက်နဲ့ သူ့ရဲ့စာချုပ်သက်တမ်း ကုန်ဆုံးသွားပြီး ယူနိုက်တက်ကလည်း ဝီလျံစ်ကို အသင်းကနေ ထွက်ခွာခွင့်ပြုလိုက်ပါတယ်။
လက်ရှိ အသက်(၂၄)နှစ်အရွယ်ရှိ ဝီလျံစ်ဟာ ၂၀၂၃ သြဂုတ်လမှာ အမြန်နှုန်း တစ်နာရီ (၉၉)မိုင်နဲ့ ကားမောင်းခဲ့တာကို ဖမ်းမိခဲ့ပါတယ်။ ပြီးခဲ့တဲ့လမှာ သူကိုယ်တိုင် အပြစ်ရှိကြောင်း ဝန်ခံခဲ့ပြီး အာမခံမရှိဘဲ ကားမောင်းခဲ့တာကိုလည်း ဝန်ခံခဲ့ပါတယ်။ ဝီလျံစ်ရဲ့ Audi A3 ကားဟာ Ford Fiesta ကားနဲ့ တိုက်မိပြီး လမ်းမလယ်က အတားအဆီးကို ဝင်တိုက်ခဲ့ပါတယ်။ သူ့ရဲ့အပြစ်ဒဏ်ကို မေလ (၉)ရက်နေ့မှာ ကြားရမှာဖြစ်ပြီး ဒီလိုမှုမျိုးအတွက် ထောင်ဒဏ် အများဆုံး (၂)နှစ်အထိ ချမှတ်ခံရနိုင်ပါတယ်။
Photo Credit : Sportcasting
ဝီလျံစ်က ပြီးခဲ့တဲ့ နွေရာသီမှာ သူကြီးပြင်းလာခဲ့တဲ့ ယူနိုက်တက်အသင်းကနေ ထွက်ခွာခဲ့ရပြီးနောက် သူ့ရဲ့ခံစားချက်တွေကို Ben Foster ရဲ့ Fozcast ပေါ့ဒ်ကတ်စ်မှာ ဖွင့်ဟခဲ့ပါတယ်။ သူက “ကျွန်တော် အိပ်ရာထဲမှာပဲ လှဲနေခဲ့တယ်။ တစ်ယောက်ယောက်က မနက် (၉)နာရီလောက်မှာ ကျွန်တော့်အိပ်ရာဘေးမှာ ရောက်လာပြီး ‘အပြင်ထွက်လမ်းလျှောက်မယ် ကော်ဖီသောက်မယ်’ ဆိုပြီး ကျွန်တော့်ကို အားပေးဖို့ ကြိုးစားခဲ့တယ်။” လို့ ပြောပါတယ်။
ဘယ်လောက်ထိ ဆိုးရွားခဲ့လဲလို့ မေးတော့ “ဟုတ်တယ်၊ အတော်လေး မှောင်မိုက်တယ်။” လို့ ဖြေခဲ့ပါတယ်။ သူက ဆက်ပြီး “အခု ဘောလုံးပွဲတွေ ကြည့်ရတာ ကျွန်တော့်ကို နာကျင်စေတယ်။ ကွင်းထဲမှာ ရှိနေချင်တယ်။ ကစားချင်တယ်။ အသင်းတစ်သင်းနဲ့ အတူရှိတာ ဘတ်စ်ကားပေါ်မှာ အတူသွားတာတွေကို လွမ်းတယ်။ တစ်ခါတလေ ဒီလိုအရာတွေက လူတစ်ယောက်အတွက် အရမ်းများလွန်းသွားတတ်တယ်။ ကျွန်တော် အနားယူပြီး အကုန်လုံးကို ပြန်စဉ်းစားဖို့ လိုအပ်ခဲ့တာလည်း ဖြစ်နိုင်တယ်။” လို့ ဝီလျံစ်က ဆိုပါတယ်။
