ကူကူရယ်လာကို မရရင် ရယ်ဂွီလွန်ကို ပြောင်းလဲ ခေါ်ယူမယ့် မန်ချက်စတာ ယူနိုက်တက်

ပရီးမီးယားလိဂ် အင်အားကြီးကလပ် မန်ချက်စတာ ယူနိုက်တက်က သူတို့အသင်းရဲ့ ဘယ်နောက်ခံနေရာ အတွက် ချယ်လ်ဆီး ဘယ်နောက်ခံလူ ကူကူရယ်လာကို တရာသီအငှားနဲ့ ခေါ်ယူဖို့ ကြိုးစားနေပေမယ့် ကူကူရယ်လာကို မရခဲ့ရင် စပါးရဲ့ ဘယ်နောက်ခံလူ ရယ်ဂွီလွန်ကို ပြောင်းလဲ ခေါ်ယူရန် ပြင်ဆင်ထားကြောင်း နာမည်ကြီး သတင်းဌာန တခု ဖြစ်တဲ့ Sky Sportsက အခိုင်အမာ ဖော်ပြလာခဲ့ပါတယ်။

မန်ချက်စတာ ယူနိုက်တက်က ဘယ်နောက်ခံနေရာမှာ လုခ်ရှော ၊ မာလာစီယာ စတဲ့ ကစားသမားတွေကို ပိုင်ဆိုင်ထားပေမယ့် မာလာစီယာက ရာသီကြိုခရီးစဉ်အတွင်းမှာ ရခဲ့တဲ့ ဒဏ်ရာကြောင့် ကာလရှည် အနားယူနေရသလို လုခ်ရှောကလည်း မကြာသေးမီကမှ ရခဲ့တဲ့ ကြွက်သားဒဏ်ရာကြောင့် ၂လနီးပါး နားရပါတော့မယ်။

Photo Credit: Sky Sports

ဒါကြောင့်ပဲ မန်ချက်စတာ ယူနိုက်တက်ရဲ့ တာဝန်ရှိသူတွေက နွေဈေးကွက် မပိတ်သိမ်းမီမှာ အရေးပေါ် သုံးလို့ရမယ့် ဘယ်နောက်ခံလူ တဦးကို ခေါ်ယူဖို့ အပူတပြင်း ကြိုးစားနေပြီး ယူနိုက်တက်ရဲ့ တာဝန်ရှိသူတွေက ကူကူရယ်လာကို အငှားနဲ့ ခေါ်ယူဖို့ အတွက် ချယ်လ်ဆီးထံ ဆက်သွယ်ထားပါတယ်။

လက်ရှိအချိန်အထိ ချယ်လ်ဆီးကရော ကူကူရယ်လာကပါ မန်ချက်စတာ ယူနိုက်တက်ရဲ့ ကမ်းလှမ်းမှုကို မတုံ့ပြန်သေးပဲ မန်ချက်စတာ ယူနိုက်တက်ရဲ့ တာဝန်ရှိသူတွေက ကူကူရယ်လာကို မရခဲ့ရင် အစားထိုး ခေါ်ယူမယ့် ကစားသမားစာရင်းကို လုပ်ထားပြီး စပါးရဲ့ ဘယ်နောက်ခံလူ ရယ်ဂီလွန်ဟာ ယူနိုက်တက်ရဲ့ ဒုတိယ ဦးစားပေး ပစ်မှတ်ပဲ ဖြစ်ပါတယ်။

Photo Credit: Express

နာမည်ကြီး သတင်းဌာန တခု ဖြစ်တဲ့ Sky Sportsရဲ့ ဖော်ပြချက်အရ မန်ချက်စတာ ယူနိုက်တက်က ကူကူရယ်လာ အပြင် စပါးရဲ့ ဘယ်နောက်ခံလူ ရယ်ဂီလွန်ကိုပါ အငှားနဲ့ ခေါ်ယူဖို့ စိတ်ဝင်စားနေပြီး မန်ချက်စတာ ယူနိုက်တက်က ကူကူရယ်လာကို မရခဲ့ရင် ရယ်ဂီလွန်ကို အငှားနဲ့ ခေါ်ယူဖို့ ကြိုးစားသွားမယ်လို့ သိရပါတယ်။

စပိန်ဘယ်နောက်ခံလူ ရယ်ဂီလွန်က ယခု နွေဈေးကွက်အတွင်းမှာ စပါးကနေ ထွက်ခွာခွင့် ရရှိထားသူ ဖြစ်ပြီး ရယ်ဂီလွန်က စပိန်ကလပ် ဆိုစီဒက်ဆီ အငှားနဲ့ ပြောင်းရွှေ့ဖို့ နီးစပ်ခဲ့ပေမယ့် စပါးနဲ့ ဆိုစီဒက် ကြားထဲမှာ သဘောတူညီမှု မရခဲ့တာကြောင့် စပါးမှာသာ ဆက်ရှိနေခဲ့ရတာ ဖြစ်ကာ ရယ်ဂီလွန်ဟာ မန်ချက်စတာ ယူနိုက်တက်ရဲ့ ကမ်းလှမ်းမှုကို ရခဲ့ရင် လက်ခံသွားဖို့ ရှိနေပါတယ်။